【盤房來料】 阿爺放水市場唔領情續調整(160126).docx

阿爺放水市場唔領情續調整 噚晚美股靠TSM出業績後做好，加上公司表示今年資本開支預測高於預期，顯示人工智能(AI)晶片需求強勁，帶動科技股反彈，美股三大指數止跌回穩。早幾日都有講過，今年阿Man係睇好TSM嘅表現，結果今次業績TSM都交到功課，有貨嘅不妨坐定定，無貨嘅就逢回吐搵位上車。至於RDW去到第二個阻力位11.8前回吐，盤後上返11.2左右，暫時個10.8-10.9睇下係咪由前阻力變支持，有貨都係keep住先。至於watch list嘅QBTS同埋IONQ都有位上車，留意返個防守位，因為呢啲股份單日波幅都幾大。RBLX暫時88有阻力，可以喺82-88呢個range炒住上落先。至於NQ仲係悶住喺個range裡面，上方一直未能突破26000，下方個支持位好似玩高咗一級，收25400-25500，玩到上去25600-25700，家陣形成咗條上升軌，只係上方遲遲未能突破，呢下有啲棘手。今日NQ個分水嶺會係25700，穿咗下面睇返個25600/25500做防守，上方暫時25900/26000阻力，要企穩26000先有條件再挑戰前高位26400水平。留意返下周一美國假期，長周末效應下，今晚美股或者會悶少少，無乜心水就放假去玩下，happy Friday，happy weekend。 講返港股今日上半場基本得一個方向，早段開市跟返噚晚夜期上咗高位開，因為阿爺減息向市場放水，不過期指喺現貨一開市就倒水，十點已經跌穿埋二萬七，逼近噚日啲低位。恒指高開171點後，一度升252點見27176高位，雖然期指略為升穿噚日高位見過27262，但恒指就升唔穿個27206噚日高位就掉頭，半日恒指報收26851，跌71點，半日成交1407億元，跌市嚟講成交又唔算大，沽壓唔係太嚴重。噚日講過26800唔可以失守，失守嘅話有機會落去26600水平回補上升裂口，結果噚日午後守住26800，今日午後或再考驗呢個位。暫時數據方面，升跌比例麻麻地，指數權重股騰訊(00700)同港交所(00388)唔精神，搞到個市都無厘神氣。噚日表現神勇嘅本地地產股，今日個別發展，急升後要抖抖氣。個股方面，創科實業(00669)表現突出，半日升4.2%係表現最好藍籌股。 藥明生物(02269)主要股東折讓3.75%配股減持，半日股價跌0.9%，算係跌得少，皆因呢期有資金開始收集生科醫藥股，不妨留意下先聲藥業(02096)，半日逆市升逾1%，但下半場大市再向下嘅話，先聲藥業有機會打回原形。技術走勢上，先聲無話特別靚仔，只係星期二當日，日線出咗支好長嘅下影線，由低位10.6，彈咗接近成蚊收返11.53，暫時可以用返10.5做個防守位，上面企穩返11.5，睇下係咪築底做反彈。公司憑藉自研及BD雙輪驅動，商業化創新藥已增至10款，創新藥收入佔比從2020年的45%提升至2025年上半年的77%，收入結構持續優化，創新轉型成果顯著。自研管線聚焦差異化，多款產品已實現BD，創新能力持續驗證，技術平台及管線有望持續BD出海。現價估值有啲低，成功築底博佢彈返上13至14元，同某啲大行目標睇到20元過外，阿Man呢個目標價相對保守。