【盤房來料】 美聯儲議息會後聲明為市場焦點(160926).docx

美聯儲議息會後聲明為市場焦點 聯儲局開始議息，要待今晚香港時間凌晨二時先有議息結果，掉期市場顯示，交易員押注聯儲局本周加息機會高達94%，大家都有共識要加息，所以美國債息高企，加上油價進一步上升，美股周二持續受壓。道指低開117點後，跌幅擴大至最多545點，低見51875，收市道指跌328點或0.63%，報52093；標指跌34點或0.45%，報7585；納指跌204點或0.78%，報25981。 重磅股中，NVDA股價先跌後回升，收市升0.6%，暫守到210之上，但阿Man都係想等埋議息結果出之後，再決定點樣處理個短炒倉。GOOG有少少腳軟，跌返1.24%，但防守位320係未見過，似乎都幾堅定。其他阿Man觀察名單內嘅股份都係咁上下，218買嘅MRVL健在，唔生唔死咁，暫時叫條50MA即係215未穿過，210個守位叫企定定上面，仍然持貨等下。至於MU幅圖有少少醜怪，暫時個下跌裂口補唔返，暫時喺條50MA附近爭持，又未企返喺970上面，尷尷尬尬咁。微軟下挫1.6%，亞馬遜跌2%；INTC股價一度升逾3%，收市轉跌0.1%，本來升得好地地，但企唔穩100MA，又係得個磨字。DELL止賺咗550之後，股價曾落過去530樓下，但收市又升返近十蚊，夜盤上埋550樓上，保持強勢。其實阿Man就好想搵位買返DELL，但就想等接近20MA大約485先再算，或者至少10MA即係518先撈返。美國參議院投票表決《數字資產市場清晰法案》(CLARITY Act)，結票未能獲通過，比特幣一度急挫5.8%，至74944美元，並拖累加密貨幣相關股份，Coinbase及Strategy股價分別勁插10.1%及5.4%。之前阿Man有提過，BTC高潮已過，暫時都係炒上落，喺62000至82000之間上落，留意再跌穿75000，又要向下玩返落去。NQ幾乎無乜大變動，仲係玩緊同一個range，分水嶺29300，支持29200/29100/29000，阻力29400/29500/29600，繼續等緊FOMC嘅議息結果。 美國10年期債息衝上2007年高位，一度升8.6個基點，至5.047厘，30年期長債孳息上揚7.2個基點至5.4厘，息口敏感2年期債息上漲5.2個基點，至4.686厘。白宮經濟委員會主任哈塞特(Kevin Hassett)於CNBC訪問中表示，無論議息結果如何，佢與總統特朗普都會尊重聯儲局決定。Macro Risk Advisors創辦人Dean Curnutt認為，聯儲局本周起加息可能導致標指回調8%至10%，因為企業利潤下降將損害盈利前景，而且不排除於12月出現第二波衝擊。不過，私募基金凱雷集團(Carlyle)行政總裁Harvey Schwartz於訪問中稱，雖然市場普遍預計聯儲局將會加息，但估計唔會進入加息周期或進取嘅減息周期。據美國銀行每月調查顯示，基金經理相信聯儲局在政策上落後形勢，25%受訪者認為貨幣政策太過寬鬆，比率為2022年以來新高。此外，49%受訪基金經理超配股票，低於上月56%，大部份視債息無序上升係市場面臨最大尾部風險；48%基金經理低配債券，為2022年5月以來高位。該行策略員Michael Hartnett指出，基金經理嘅3.9%現金比率仍處於觸發風險資產賣出訊號水平。美滙指數曾升0.3%至99.69，日圓挫0.58%至155.24兌每美元。其實市場都預咗今晚會加息，反而會後聲明，放鷹定放鴿更為場關注。 港股昨日未能挑戰二萬五關已全跌足全日，恒生指數略為高開16點後，報24934已為全日高位，開市即掉頭向下，全日跌250點，報收24667，成交額進一步回落至1872億元，但北水則繼續錄得淨流入。昨日內地公布三頭馬車數據表現分化，數據反供強需弱嘅分化局面，其中規模以上工業增加值按年增長5.2%勝過預期嘅4.8%，但社會消費品零售總額僅增0.4% 且固定資產投資累計按年下跌 7.2%，兩者均遜於市場預期。整體而言，目前內地經濟形勢喺工廠生產及出口端維持韌性，但國內消費與投資「供強需弱」矛盾依然突出，今年中國經濟增長能否維持5%嘅官方目標成為疑問，當中高盛已將中國2026年GDP實際增長預測由4.6%下調至4.5%，而工業生產與疲軟國內需求之間依然失衡，中東風險再度升溫、房地產行業疲軟及政策寬鬆推遲，料拖累短期經濟增長。高盛認為，近期當局釋放訊號為增長進一步放緩，令全年4.5%至5%目標面臨壓力時，預期當局或有更多刺激措施出台。不過此時此刻，三頭馬車缺兩頭，料中港股市暫難轉強。 今早恒指高開122點，但未能重返24800水平，一度跌92點見24574，但內地A股回升，帶動半日升30點，恒指報收24697，但成交額縮水到得返956億，愈玩愈縮，開始步入陰乾格局。市場焦點係今晚議息結果公布後嘅會後聲明，再留意埋債息變化。一旦局方放鷹，料對環球股市帶來更大震盪。而周五將迎來日央行議息，一旦日央行決定加息，而日圓繼續抽升，引發Carry Trade大量拆倉，料全球風險資產去槓桿將掀起更大風暴。 短線港股反彈仍阻力重重，恒生指數上方首個阻力為24900-25000，剛好為5日線24923及20周線24993水平，亦為20月線24920之所在。下一阻力25150為10日線25152及100日線25140匯聚區，25300即20日線及50日線附近阻力更大。留意目前除50日線之外，全部移動平均線持續向下，當中期指5日線已下移至24801、10日線及20日線分別下移至25056及25297，100日線則下移至25084，5日線及10日線急速向下，跌穿20、50日線及100日線，一旦指數再跌穿日線保力加通道底部，即24662，料後市跌勢或加劇。短線大市首個支持為24350，即6月至8月反彈浪回調黃金比0.5，下一支持為24150，即100周線所在，而24000心理關口為重要支持，亦為好友重要防線，不容有失。