港股反彈浪持續 留意短線支持16200不容有失
11月8日，大致多雲，間中有幾陣驟雨，日間部份時間有陽光。美股逼近中期大選，暫時美股靠穩向好，三大指數隔晚向上，道指升423點，標指跟納指分別升36點及89點。早前幾個指數都反彈至阻力位附近，加上超買令美股有所回落，但經過喺高位整固後，超買情況改善，美股繼續其反彈之旅。不過相對傳統股份，科技股仍然跑輸，兩龍頭蘋果公司及Tesla勢弱，前者減產300萬部iPhone14，股價回落至140樓下，暫見支持。不過Tesla跌穿200美元大關後。喺理想業績下仍見下調壓力，暫時走勢一浪低於一浪。喺美息高企下，科技股難免受壓，
關於中期選舉，暫時民調顯示共和黨有望成功奮回參眾兩院其中一院嘅控制權，但呢個亦係早有預料。而根據過往紀錄，當中期大選完結，不明朗因素消除下，美股都會有一輪上升。至於今次大摩有分析指，共和黨能夠喺今次選舉勝出的話，有利美債息回落，當然有利於美股繼續反彈。
中期選舉完結後，周四又迎來CPI數據，市場普遍預期通脹開始見頂，CPI有機會回落至8%以下，重點係9月環比跌幅有幾大，核心CPI表現如何，由於有滯後嘅情況，今次都好難期望CPI會有好大跌幅，核心CPI高企嘅話，有機會成為淡友反攻嘅藉口。由於呢啲通脹數字仍高企，債息自然難落，隔晚10年債息亦重返4.2%，市場仍然估計息率仍未見頂。
睇返美元跟美匯指數近日有所回落，人民幣大幅反彈至7.2水平，而近日見資金開始暫停流出新興市場，上個月美元喺新興市場流出嘅情況嚴重，但近日已得到改善，顯示喺新興市場股市回落至低位後，已有資金開始吸納。就以港股嘅情況，雖然噚日有幾個利淡消息夾擊，分別係股神再度減持比亞迪(01211)、內地官媒再次強調清零政策不變，以及本港銀行體系結餘跌穿1000億元心理關口等，但亦無礙港股再升。恒指昨日再升434點至16595點，港股反彈勢頭持續，而成交額亦保持暢旺，港股反彈之旅未有停止。
過去兩星期北水買貨變得積極，而公司回購亦加大力度，喺沽壓減少嘅情況下，唔少重磅科技股近日已見顯著反彈。留意16200至16400為近日密集區，一旦跌穿就要提高警覺，畢竟港股仍未完全擺脫熊市，暫時反彈浪睇住幾個位，17000/17500/18000，且看喺成交保持暢旺下，好友能否逐關擊破。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。