12月5日，部份時間有陽光，局部地區能見度較低，日間天氣乾燥。隔晚道指低開156點，跌幅一度擴至215點，低見36029點；標指曾挫1.04%，納指最多大跌1.72%，但到尾市跌幅收窄。道指跌幅縮至41點；標指跌24點；納指跌不足1%，跌119點。不過反映中國概念股表現嘅金龍指數回落2.09%。
科技龍頭股有高管沽貨套現，亦說明咗美股現價估值偏高，Facebook 母企Meta行政總裁朱克伯格披露兩年來首次減持公司股份，涉近1.85億美元，Meta股價應聲下跌1.5%。不過Meta今年以嚟已已勁升逾1.7倍。其他重磅科技股偏軟，微軟及Nvidia分別跌1.4%和2.7%；英特爾急滑3.6%，為跌幅最大道指成份股。之前古天后都提過好多次，標指升至4600阻力唔細，加上距離新高尚不足5%，資金入市開始變得審慎。資金開始轉向追落後板塊，市場有換馬現象。
當優質科技股估值開始偏高，仲要有自己友沽貨套現，市場游資開始轉去炒三四線股，繼連登契媽嘅COIN由72美元急升至146美元後，準備破產嘅GME亦開始有資金炒作，出現劣幣驅逐良幣現象。喺美股持續強勢下，散戶參與度已創下今年新高，散戶佔比增加，令垃圾股重展升浪勢。
今晚美國將公布小非農，週五公布大非農數據，估計就業市場繼續放緩，應該唔會對下週三凌晨議息有重大影響，市場早已認定息口見頂，12月再加息機會有限，反而係會否提早至明年3月減息，市場估提早至3月減息機率已高於五成。目前係集中討論明年應該減息4次定係5次。
從11月美股走勢去睇，美股空軍已經撤退，但債市空軍卻未完全撤離，市場開始吹風明年會減息5次，但倩市空軍死守，主要係10年債息尚未回落至4%以下外，而具有3倍槓桿嘅20年長債ETF(TMF)，沽空率由400%再增至700%，沽空金額高達200億美元，債市空軍仍然相當進取，估計係同鮑爺維持偏鷹口吻，以及聯儲局官員不定時放鷹有關。
至於中港股市唔單止令人失望，直情係令投資者感到絕望，即使國家隊真金白銀入市，A股仍然買唔起，每日低開低位徘徊，去到臨收市半個鐘前先有資金入場托起尾市嘅技倆每日重演，都似乎無乜好講。股創指2000鐵底會爭持一下，誰知輕易又跌穿，結果鐵底變鐵頂，成為反彈阻力。
恒指走勢持續疲弱，一副要向下尋底的形態，美股升8日跌1日，但港股相反彈一日，跌四五日，不過嚟到17000水平，每日成交都過千億，現水平係有錢入場低吸，但有買盤低吸都要跌，說明沽壓勁過買盤，高追就更加免問。港股面對係資金不足問題，而資金唔肯重返港股，最大係信心問題，唱好香港故事，並唔係打嘴炮。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。