【盤房來料】 恒指裂口低開即市回補裂口(170926).docx

恒指裂口低開即市回補裂口 美國上周公布8月份通脹維持高企，加上最近美伊戰事再度升溫，油價推爆上去100美元樓上， FOMC投票一致通過將聯邦基金利率目標區間調高0.25厘，至介乎3.75厘至4厘，符合市場預期。其實本月加息早已無懸念，但議息結果公布後，加上聯儲局主席沃爺表示通脹太高，而最新利率點陣圖顯示，官員料今年底利率中位數為4.1厘，高過6月預測3.8厘，意味至明年仍有機會再加息一次；道指一度跌906點。美股隔晚三大指數回落，道指輕微高開22點後窄位拉鋸，議息結果公布後，一度插水906點，收市跌幅收窄至631點或1.21%，報51461；標指跌幅收窄至33點或0.45%，報7551；納指幾乎收復全部失地，僅跌3點或0.01%，報25978。 其實睇返美股嘅反應，都算係咁，以為加息啲資金需求較大嘅AI股會插水，誰知全部安然無恙，阿Man擺定晒買盤，結果只係NBIS喺210中咗一注。MU見幅圖曳曳地，進取少少擺咗個買盤喺900同890，準備100日線附近先上車，結果係影都無。至於保持強勢嘅DELL，只係回到去543條5MA附近，阿Man已經擺咗喺535條10MA想接返啲貨，可惜又係得個桔，盤後股價已重上570，暫時與DELL無緣。MRVL繼續持有，220防守位守到，股價盤後上返230樓上，坐定定先。GOOG係要有耐性，320守住就唔理住，博股價慢慢收復埋50MA同100MA。NVDA幾乎無乜變動，短炒就無乜着數，一直擺住個GTC買盤喺200，接到就接，反正有免本貨長期持有。另一隻阿Man噚晚想博大霧擺咗買盤嘅係AVAV，150買唔到，最低151，就係嗰1元之差，以圖論圖，AVAV行咗個小圓底出嚟，走勢唔錯，今晚或者睇下152-155之間，有冇機會撈一注。 今次議息後一併公布季度經濟展望，局方估計美國今年國內生產總值(GDP)增長2.3%，高過6月估算2.2%；今年底失業率為4.1%，較6月預測4.3%低，核心通脹率3.4%，6月預期為3.3%。沃爺繼續未有提交任何利率預測。聯儲局於一連兩日會議後發出聲明，提到美國經濟以穩固步伐擴張，雖然地緣政治局勢依然帶來高度不確定性，但本地開支強韌，生產力增長強勁，以及資本投資表現強健。沃爺會後召開記者會，表示通脹水平仍然太高，幾乎未見改變跡象，局方未確信通脹正朝2%目標水平回落。佢上月底Jackson Hole全球央行年會上放鷹，警告通脹未有明顯放緩，明言2%通脹目標係堅固且固定，若然喺通脹未有持續下降，官員需要採取行動。今次議息距離美國中期選舉只有7個星期，加息當然係不利共和黨選情，特朗普過去多次狠批前主席鮑唔不願大幅減息，家下佢一手提拔嘅沃爺主導加息，即管睇下侵侵對佢容忍度有幾大。 美國10年期債息一度回落6.96個基點，至4.9323厘，議息後最多轉升3.3個基點至5.029厘；對息口較敏感嘅2年期債息倒升7.9個基點，至4.742厘。美滙指數曾升0.73%，至100.34，日圓跌0.85%，至156.42兌每美元。市場risk off，加密貨幣「一哥」比特幣一度挫1.93%，至74995美元，其後轉穩。目前對資本市場較大嘅隱憂係油價高企，債息高居不下，未來息口路徑又充滿不確定性，對於股票市場嚟講，暫時策略都係保守少少好。以為議息結果出咗嚟，個NQ會有明確嘅方向，結果NQ仲係困住喺近日個區間內上落，今晚個分水嶺略為上移至29350，支持29250/29150/29050-29000，上方29450/29550/29650-29700。 至於港股噚日好淡爭持，雖然恒指收市倒升46點，報收24713。不過夜期時段則難逃一跌，夜期更跌近300點，以接近全晚低位24400收市，ADR則回落至24600水平之下，較昨日收市低水逾百點。今早黑期於24500附近徘徊，恒指裂口低開233點，見24480，一度跌356點至24357，剛好去到6月至8月份嘅反彈浪段黃金比0.5位，即反彈，跌幅半日削半至180點，報收24533，但成交僅991億元，唔多似乎底部大成交有支持，落完就回升嘅款。 不過道指期貨正反彈，而亞太區股市亦未見因美股加息急跌，港股又去到黃金比嘅支持區，加上本周高位約25000水平，周波幅已有700點，亦算係滿足到周波幅要求，短線有反彈都正常。只不過港股弱勢已成，加上跌穿多條移動平均線，即使跟隨外圍略為反彈，但反彈上方仍然係阻力重重。恒指短線首個支持為24350，為6月至8月反彈浪段黃金比0.5，而100周線為24163及24000心理關口為下一重要支持。反彈阻力方面，首個阻力為24700，約為5日線及5月線所在，下一阻力為24950-25000，即10日線及20周線所在。港股至少要重返25000水平，方能扭轉目前弱勢，但要扭轉蛋散格局，則要收復全部移動平均線，改變目前空頭排列，即至少要重返25300-25700水平。在高息環境下，加上港股成交持續萎縮，港股暫時仍處於一浪低於一浪嘅尋底格局。