9月19日，大致天晴，但間中有幾陣驟雨，日間天氣炎熱。今周被喻為「央行超級周」，除美國聯儲局外，仲有英、日及瑞士銀行等多間主要央行議息，投資者入市趨審慎，昨晚美股好淡爭持，，靜侍聯儲局議息，道指升6點；標指跟納指分別升3點及2點。美股目前仍然喺高位整固，待市場對Q4息口走勢再作判斷，加上聯儲局或要到明年中先有望開始減息，喺美股估值又唔算便宜之際，基金亦唔急於追貨。
雖然美股暫時唔似會大跌，但向上值博率有限，資金寧願等待回調再有低位先入場，美股亦唔見有大量資金流入，部份市場游資流入債市，過去三個月美財政報發債近7500億美元，資金流入債市，留意當隔夜錢減少至5000億美元樓下，或令流動性收緊，呢度要注意一下，或對估值已高嘅美股構成隱憂。
美元偏強，雖然美匯指數未升穿105，一旦升穿或令資金快速撤離新興市場。人民幣目前於7.29水平徘徊，由於人民幣疲弱，喺新興市場走強之際，未見中港股市受惠。港股噚日跌逾200點，恒指收市失守萬八關，弱勢未改。阿爺出盡奶力救市，可措A股表現仍差強人意，一句到尾都係欠缺成交配合，無資金入場，再多嘅政策都托唔起個市。內地上月底公布包括印花稅減半、嚴限股東與高層減持，以及階段性收緊IPO等，但A股當日高開急升5%後，收市升幅已縮水1%。上證及滬深300指數至今原定踏步，跟阿爺使出組合拳前相約，成交則不斷萎縮，投資者入市意欲低迷。港股呢幾日成交都不足千億元，噚日成交額跌至800幾億，成交低迷情況持續。港府早前成立專責小組，就本港股市流通性開會，不過會唔知開咗幾多個，但一直未見任何措施出台，司長都忙於大搞夜經濟，但日經濟重要命脈股市就不聞不問，估計要等10月份特首嘅《施政報告》先會有公布，睇嚟呢個9月港股都唔會有乜嘢突破，繼續易跌難升。
恒指再失守全部移動平均線，10日及20日線齊齊回落並匯聚於18150水平，而萬八失守後，由之前嘅支持變為阻力，今日都上唔返萬八企穩，短線港股將繼續向下尋底，若然失守17800短線支持，前底17573凍過水。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。