8月22日，天氣炎熱，部份時間有陽光，亦有幾陣驟雨。隔晚市場焦點係Nvida業績，出嚟結果又好過預期，股價急升逾8%，帶動科技股向上。道指就跌少少，埋單唔見36點；但標指跟納指分別升30點及206點，標指回調至舊年8月反彈高位4325後回升，已重返4400水平，VIX喺17水平徘徊，反映市場恐慌程度未見上升。隔晚美股係靠Nvida同埋Tesla兩股反彈帶動科技股做好，但息口問題仍然困擾大市。
上半年美國購房需求不斷攀升，30年的抵押貸款利率已升至7.48%，已屆22年新高，供樓負擔上升令房屋建築商開始變得保守，據統計美國8月新屋開工率正急速放緩，市場更關心週末各央行行長喺Jackson Hole會議舉行期間發表講話，放鷹抑或放鴿，對未來息口路徑會有所啟示。6月份鮑爺暗示今年仲要加息兩次，其中一次喺7月加息一次0.25%，近期美國被調低評級，債息上升令11月加息機率由25%提升至38%。目前美國CPI已連續下降11月個月回落至3.09%，7月開始觸底回升3.30%，估計8月可能進一步反彈至3.8%，通脹回升可能令鮑爺再度放鷹。
至於噚日人仔一度低見7.33水平，其後反彈至7.28水平，似乎有無形之手正阻止人仔進一步下跌，中概股隨人民幣反彈。ADR跟夜期回升，但反彈力度有限。預期今日港股亦會有啲反彈，不過有冇本事補返噚日個下跌裂口，上返去17900都成疑問，唔排除彈到17800附近已行人止步。
阿爺想放鬆銀根，但銀行拆借市場，一年期LPR只降10個基點，5年期不變，反映銀行對長貸唔多願減息，短貸降幅亦跟唔足央行下調幅度，經過年初大量放貸畀業主借新貸還舊貸後，銀行息差已有明顯收窄，部份銀行息差已少於180基點，即係銀行借貸要面對風險大幅增加，但息差卻收窄，借貸生意愈嚟愈難做，基本上銀行都唔多願再放貸。
當噚日呢個不似天氣預期嘅LPR下調幅度出爐，A股即倒水咁落，A股因為缺乏資金入場，開始呈陰乾式向下，外資繼續淨流出，港股噚日亦再跌逾300點，連續兩日下跌成交超過1000億元，可以話低位多咗資金買貨，但咁嘅成交額，未似係見底回升格局。港股今日即使有反彈，估計力度亦唔大，可能回補裂口，去到17900附近又再回頭。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。