港股萬九水平整固 恒指18000至18400有一定支持
12月8日，大致天晴，早晚清涼，天氣乾燥，日夜溫差較大。美股隔晚反覆靠穩，三大指數變動唔大，仍然係納指表現較為落後，標指守住3900水平，目前仍然喺3900-4100之間整固，成交則偏靜，應該係議息前大家都唔想出手。科技龍頭股表現麻麻，蘋果公司正削減iPhone供應商訂單，市場擔憂iPhone銷售不似預期，股價出現3連陰，已跌至140美元水平，一旦失守，唔排除進一步下試135美元尋找支持。另一龍頭Tesla表現亦疲弱，打擊科技股投資氣氛。
美國10年債息跌至3.43%，只係債息下跌未見對息敏感嘅科技股帶嚟支持，反而科技股表現繼續疲弱，反映市場之前博科技股反彈嘅資金離場。主要係CPI數據雖然已見頂，但回落速度較為緩慢，資金自然唔會太進取。尤其係反映喺CPI部份嘅房價有一定滯後，呢個亦係CPI喺10月份仍高過預期，直至11月CPI先反映房價房租開始回落嘅因素。估計未能幾個月，CPI回落速度應加快。
至於港股呢邊，噚日又嚟一次反高潮，恒指噚日午後一度因為內地公布優化防疫措施而急升至19800水平，只係市場憧憬嘅開關並未有任何公布，大市衝高後獲利盤湧現，最終高位回吐近千點，恒指更跌至全日低位18814收市。港股呢一轉由17000點再起步，至昨日升抵19800水平，已超額完成古天后預期範圍19500點，而噚日出現嘅呢枝大陰燭，對短期升勢有一定破壞，北水錄得單日淨流出50億元，早段追入嘅資金，再變成韭菜待被收割。
不過港股升抵萬九水平後，成交仍然keep住喺1500億以上，可見市場不乏資金，只係進入高位19000水平，入市資金變得更審慎，亦需要時間消化急升後，現貨已出現超買。呢兩日資金開始由一線股份流入二線股份炒作，嚟到呢啲時候又要提高警覺。內地噚日公布完優化防疫措施，短期應該唔會再有咁多政策出台，始終仲有個幾月就過年，要待春節過後，先會再有新政策出台。估計呢段時間，又開始接近聖誕節長假期，節日氣氛漸濃下，港股而要回調抖氣，短線支持係10日及100日線，大約係18400水平左右，而好友嘅最後防線，將會係20日線，即18000水平，只要呢啲位守得住，後市仍有機會以一浪高於一浪嘅方式向上推進。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。