【盤房來料】 港股失守多條移動平均線明顯轉弱(180526).docx

港股失守多條移動平均線明顯轉弱 美國總統特朗普上周五36小時「旋風式」訪華行程，打道回府，但明顯中美雙方矛盾未有化解，雙方所促成嘅貿易協議，包括中國承諾購買更多美國大豆；以及向波音訂購飛機；同埋中國允許部份中企可使用H200晶片，對美國嚟講，只係小恩小惠。加上中美喺中國糾結嘅台灣問題上，美國亦未有就此有明確表示唔會干預相關問題，結果市場係希望愈大，失望愈大。特朗普踏上空軍一號後，喺該專機上回應傳媒提問時表示，喺訪華期間，佢同習近平於會談中達成共識，伊朗不能擁有核武，以及必須重開霍爾木茲海峽。只不過特朗普亦表示，佢本來唔贊成美伊停火，美國只為幫巴基斯坦忙而停火。潛台詞係侵侵結束訪華行程後，隨時再同伊朗開火，結果紐約期油因此而重返100美元水平之上。而美債息回升，美國10年期債息一度大漲14.9基點至4.606厘一年高位，30年長債孳息升11.7基點至5.13厘。同時，日本30年期債息升上4厘，係近十年高位；同年期英國債息創28年新高。全球債息回升，拖累多地股市走軟，市場風險胃納急降，比特幣曾急跌，目前已重返78000美元之下。而市場開始懷疑今年非旦唔減息，仲有機會加息，連金價亦被拖累，跌至4500美元水平方喘定。 美股上周五顯著調整，道指周五收市瀉逾500點，報數49526，跌537點或1.07%；標指挫92點或1.24%，報收7408；納指更跌410點或1.54%，報收26225。Nvidia重挫4.4%，英特爾及美光跌逾6%，Tesla降低4.8%。維權投資者阿克曼稱將披露持有微軟股份，微軟逆市漲3.1%，波音雖然接到大單，但股價再跌3.8%。睇返今早美股股指期貨偏軟，NQ今早一開就跟日本仔跌，盤中去到28900水平先見支持。今晚NQ個好淡分水嶺喺29000，支持28900/28800/28700/28600，阻力29100/29200/29300/29400。都係要睇住個債息做人，債息喺高位，股市無運行。 至於港股上周表現反覆，雖然習特會舉行期間，恒指周四高開450點，一度高見26844近三個月高位便掉頭回頭，結果全日升幅最終全數蒸發，僅升1點，周五更急速下滑，跌至25847低位，最終報收25962點，跌426點收市，按周則跌431點或1.63%。至夜期及ADR時段，港股表現持續疲弱，加上美股三大指數調整，拖累夜期一度跌穿25700水平。今早恒指低開25838，並未見遺下太大個下跌裂口，目前現貨裂口25838至25847，裂口不足10點，期貨裂口25753至25792，亦只有39點，反而今早港股低開低走，已跌穿5月5日低位，並返回4月8日所遺下嘅巨型上升裂口25254-25668之內，更失守50日線，僅險守250日線，走勢急轉直下。半日成交額1612億元，跌市嚟講，半日呢個成交沽壓又唔算特別大，但失守多條移動平均線，下行壓力正增加。 短線即使守到250日線有反彈，上方25800-25850，大約係5周線係首個阻力，即市反彈乏力嘅話，25750條50日線亦未必上得返。而期指周五即市成交密集區底部25850，大約係現貨嘅25900，阻力更大。港股表現忽然轉弱，主要受到上周習特會並未見任何具體成果，中美矛盾未能化解，再加上外圍股市創新高後，開始進行調整，港股受拖累喺未曾再見高位嘅情況已回頭。港股本周必須重返26150-26200水平，為上升通道底部，恒生指數才能緩解下跌壓力。至於下方首個重要支持為50日線即25750，今早已失守，而近一個月低位，亦大約係日線保力加通道底部，更不容有失。 暫時環球股市受債息回升而調整，港股之前未有隨外圍創新高，反而因外圍調整而再度回軟，跌穿多條移動平均線，一旦呢個星期失守25600及250日線，本月下旬大市或向下回補裂口，下試25200水平，甚至25000較強支持。本周關鍵為港股能否收復26000失地，及重返多條移動平均線上。