【盤房來料】 輝達業績公布後美股仍反覆(181126).docx

輝達業績公布後美股仍反覆 Nvidia於收市後公布業績,此前美股周二晚再急挫,道指低開221點後,跌幅擴大至最多1041點,低見50566,標指曾跌2.49%,納指100指數一度跌2.27%。道指收市仍下挫848點或1.64%,報50759;標指跌1.03%,報7340;納指跌181點或0.74%,報24328。 NVDA盤中股價曾挫3.7%,收市跌幅收窄至0.4%;收市後公布業績,不過前舵手黃仁勳風波仍然鬧哄哄,管理層包括臨時行政總裁Colette Kress預計會被投資者追問,公司所面臨嘅政治及訴訟風險。黃仁勳會否重掌帥印或物色新舵手進展、中國業務實質規模,以及未來會否繼續為客戶安排融資等等。該公司已宣布董事局新設委員會,負責監督國家安全政策、出口管制合規等事務。不過盤後股價反彈一度重上160美元水平,可借未能企穩。美國眾議院委員會確認,黃仁勳將於12月1日出席眾議院多個委員會嘅聽證會。另外,黃仁勳發表卸任後首次公開聲明,表示如果董事局同意,佢願意重返公司擔任CEO。不過暫時董事局未有想畀佢回巢嘅意願。阿Man以169平均價持有嘅短炒貨,喺盤後見170影都無,162減咗一份部,再排入返個152,游住水先,否則好難減輕個持貨成本。其他短炒貨繼續無加無減,唯獨係之前MU一直擺咗個680同660嘅GTC買盤,噚晚中咗個680,另一個660買盤未中,盤後彈返上754最高,可惜又唔企750,最終夜盤又去返730樓下,始終5日線同10日線仲係綁手綁腳。不過680呢啲位接近250日線,其實唔再穿前底,持貨到年結或者有驚喜。至於NQ就盤連夜盤,日日行夠800-1000點,做啱邊當然執到寶,錯邊又唔係止蝕,就輸到嘴到歪。 美國銀行每個月都有做調有關基金經理嘅持股比例,以最近一周資料顯示,基金經理對科技股淨增持比率,從10月37%急降至12%,係自2006年6月以來最大減幅;38%受訪者認為企業投資過度,52%預期人工智能(AI)超大規模雲端服務商將於未來6個月放慢資本開支。富國銀行策略員Ohsung Kwon給予標指2027年底目標只有8200,雖然意味較周一收市仍有逾一成上升空間,但係所有華爾街策略員之中最低目標之一。呢位仁兄睇到咁保守,原因包括企業盈利增長減慢、利率中性、投資者情緒低迷,以及經濟環境充滿挑戰。同時有交易員表示,有關美國國家安全局(NSA)網絡中斷消息,加劇市場近期對美國科技基礎設施穩定性憂慮,並對股市構成壓力。蘋果iCloud及App Store等多項服務呢幾日曾出現中斷,系統安全問題對股價構成壓力,股價回吐0.3%;Salesforce急跌9.4%,為跌幅最大道指成份股。 恒指昨日低開232點,已出現第四次裂口下跌,盤中曾低見23369。雖然盤中曾反彈至最高23626,仍遺下23點裂口未完全回補,收市報23508,跌245點,成交額略增至1980億元,有賴北水再次趁低吸納,錄得淨流入22.04億元。至夜期時段,美股再度下挫,曾拖累夜期再次回落至日市低位,報收23400水平。Nvidia於盤後公布業績,帶動科技股回升,納指亦低位反彈500點,黑期今早重返23600水平,以為開市今日港股會有得彈下,誰知反而又低開。恒指低開79點,報23428後,早段窄幅上落,其後淡友見成交淡靜,又出嚟做世界,大市愈跌愈有,半日最多跌267點,低見23240。恒指半日收報23241點,跌266點或1.13%。半日成交868.95億元,北水繼續錄得淨流入,半日掃貨25.65億元。今早未有如期反彈,反而美股彈完回落,淡友就出嚟做世界。暫時大市已跌穿晒全部移動平均線,今早連23400亦失守,若如阿Man所料,再穿條20日線,11月必見多一個低位,下半場都凶多吉少。今日收市輪到QQ(00700)出業績,暫時出完業績嘅重磅股,十居其九都係瓜多過菜,除非QQ有例外,無例外嘅話,似乎大市向下考驗22800-23000年內低位機會大。反彈方面,暫時首個阻力為23400-23500,企穩23500則有機會回試20日線,即約23700,企穩則反彈持續,下一反彈阻力為5日線約23800水平,及密集區頂部23900。如 一直未能企穩23950即企穩10周線之上,幾可判斷調整持續。大市要扭轉弱勢,至少要重返10日線24150及上升裂口頂部24250之上,方有條件重拾升勢。
【盤房來料】 輝達業績公布後美股仍反覆(181126).docx
Administrator 2026年11月18日
分享這個貼文
標籤
封存
【盤房來料】 市場屏息以待輝達公布業績及管理層變化(171126).docx