7月10日，大致天晴，但局部地區有驟雨，日間天氣酷熱。上周五美國公布非農數據不及預期，美股早段向上，但中段後由升轉跌，道指跌187點；標指跌12點；納指則跌18點。美股動力開始減弱，不過標指仍守於4300-4350呢個支持範圍，表現又唔算太差。留意小非農數據強勁，市場預估11月加息至55%嘅機率增加至45%，但當周五大非農數字一出，機率又下降至11%。不過聯儲局已表明今年內唔會減息，並將喺餘下時間再加息兩次，預期息率或維持喺4.5%以上高位一段長時間。
中概股周五晚表現神勇，反映中概股表現嘅金龍指數升逾3%，主要係人行上周五宣布向螞蟻集團罰款71億元人民幣，市場解讀為整改完成，阿里最壞時間已過，不明朗因素消除，有機會再作估值重評。阿里則再出通告，指螞蟻有意回購7.6%股份，其回購價反映螞蟻估值約為5671億元人仔，呢個估值大約係兩年前IPO估值貶值七成。
雖然市場將今次罰款解讀為對科網股整改嚟個終結，但阿爺啲真係五時花六時變，皆因之前都話整改告一段落，誰知阿爺罰完一次又一次，重點係阿里管理層形象一落千仗，今年3月高調宣布改革分拆，股價急急炒高三成，其後竟然係畀機會軟銀高位減持，股價一個月後又打回原形。
記得2007年阿里以13.5元IPO上市，其後股價大幅炒高後，再批股予基金，但隨住金融海發生，股價於2012年跌破10元，以每股9.35元進行私有化，其後阿里再重組，將最賺錢及最值錢嘅螞蟻金服股權售予管理層，馬雲變成螞蟻金服大股東，重組後阿里再去美國上市，阿里則持有33%螞蟻金服股權，其後阿里再炒高逾百倍後回歸港股上升，2021年初股價升抵300元水平，但目前連紅底股身份都無理，並於90元樓下徘徊。即係阿里兩次上市，IPO買入嘅股東，一直持貨唔走嘅話，無論第一或第二次上市嘅IPO貨，長情坐貨嘅都係無錢落袋，呢個係古天后認為其管理層形象一落千仗嘅原因。
今日港股都預咗高開，但能否高開高走，古天后就睇得較淡，高開低走機會較大，指數唔上返18800企穩，都係偏淡，尤其恒指已失守多條移動平均線，即使阿里呢個消息，若未能帶動恒指重返18800水平，本論嘅下跌浪尚未完結，短線支持為18500及18300，呢兩個上周低位失守，萬八關應該凍過水。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。