美股上周五四巫日，三大指數偏軟，反映中概股嘅金龍指數則先高低，市場觀望鮑爺呢個星期出席國會嘅談話內容。暫時美國國務卿訪華，未見中美雙方有咪嘢實質而又有建設性嘅談話內容，加上國常會後，遲遲未見阿爺推出刺激經濟政策，離岸人民幣上周五彈咗一下，今早再度轉弱，跌逾兩百點子至7.15水平，令港股喺連升三周後，今早受壓回軟，未能企穩二萬大關。
恒指低開56點，一度重上半日高位20000點，跌幅收窄至40點，可惜二萬大關未能企穩，其後跌幅擴大，半日多跌321點，見19718半日低位，但50日線仍守得住，半日恒指跌314點，報19726；國指跌124點，報6708；恒科指跌110點，報收4122，跌幅達2.6%。半日成交額535.31億元又回復較為淡靜，今晚美股休市，星期四輪到港股放假，而內地股市則星期五放假，假期前夕大家都少做少錯，唔敢多手。
藍籌股普遍下跌，友邦(01299)跟大笨象(00005)逆市向上撐住指數守喺50日線之上，大笨象更逆市創52周新高。中移動(00941)亦有份出力，加埋三桶油都逆市上升，否則何止50日線保唔住，250日線都有機會失守。今日(19日)正式推出「港幣-人民幣雙櫃台模式」及莊家機制，可供交易證券有24隻，話就話呢堆股份都係重磅股，佔總日約成交額四成左右，但今日重磅科網股跌勢明顯，人民幣櫃台成交偏弱，港交所(00388)半日跌1.7%。港股累積咗超過二千點升幅後，回調抖抖都好合理。
ATMJ半日全線仆直，跌幅超過3%，百度(98888)半日更跌逾4%，雖然618購物節阿里巴巴(09988)旗下淘寶天貓618網購節參與商家規模創紀錄，可惜股價跟京東(09618)亦仆直，主要係市場預期電商銷售增長已難復當年勇，苦非大灑金錢作為寶貼，仲點會有呢啲成績，股票係買公司未來表現，都預咗未來電商搵嘅錢愈嚟愈少。人民幣再度走軟，內房股又點會有運行，碧桂園(02007)跌近6%，為半日表現最差藍籌。
暫時大行喺累計升逾2000點後調整亦相當全理，況下二萬大關無咁容勿企穩，尤其北水炒作短癮，周四周五連續兩日都錄得淨流出，仲話推雙櫃台後有助帶動港股氣氛，港股成交愈玩愈縮，唔通外資走咗人，會因為你個雙櫃台就重返本地魚缸咩，今日首日出雙櫃台大市就插水，反映實際參與雙櫃台交易嘅，真係少之又少。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。