港股於19500水平可分段撈貨
雖然鮑爺喺議息會議已表示排除未來加息0.75厘嘅可能，但隔晚美國十年債息攀升至3.2厘，美股嘅科技股領跌，三大指數跌幅顯著，更跌至今年低位。幸而A股低開高走，上證指數半場已倒升，令港股今朝低開跌逾800點，創逾兩個月低位後跌幅收窄。
恒指裂口低開701點，跌幅一度擴大至823點，見19178點半日低位，亦跌至兩個月低位，其後內地股市倒升，港股跌幅亦收穿至345點，見19656半日高位。不過喺市場氣氛疲弱下，半日恒指仍要跌逾500點收市，報19436，跌565點；國指中午報收6585，跌224點；恒科指半日跌189點，報3846。
藍籌股普遍下跌，雖然美息上升，港息亦跟隨，但金融類股份仍要下跌，友邦(01299)半日跌1.6%、大笨象(00005)跌幅更達2.4%；平保(02318)半日跌2.6%。有傳聞指碧桂園(02007)位於成都、福建等多地監管賬戶被凍結，但集團已解釋於福建參股項目發生「客訴」，涉及事宜已解決，不過市場仍半信半疑，碧桂園半日跌逾12%，連帶旗下碧服(06098)亦跌12%，兩股成為表現最差兩成份股。不過阿Man卻認為碧桂園喺過去一年，內房股爆雷之際，碧桂園從未見有任何債務遺約，更曾次以超值價格收購同業，其財務實力可見一班，反而今日股價跌逾一成，係趁低吸納嘅好機會。
美國嘅科技股跌到一仆一碌，港股呢邊嘅科技股陪跌亦好正常，騰訊(00700)、美團(03690)半日分別跌3.7%及5.4%，不過今早低位，正好係阿Man捕住要撈貨嘅水平，145樓下嘅美團跟335樓下嘅騰訊，又可以上一上車。至於京東(09618)半日跌近一成，200元邊又提供一個短炒上車機會。其他科網股半日跌半成閒閒地，不過博個市短期跌夠要反彈，都係揀返騰訊、美團同京東呢三寶。
國際油價急挫6%，石油股回軟，三桶油嘅中石油(00857)跟中海油(00883)半日跌逾半成，中石化(00386)亦跌2.8%，其他石油相關股份，普跌2%或以上。除咗石油股受壓外，資源股亦見沽壓，金價雖然未見大幅回落，但紫金(02899)半日跌近一成，其他資源股閒閒地跌半成或以上。
大市早段跌逾800點後反彈，而牛證重貨區已屠割得七七八八，暫時19000-19200點可能係短線支持位，而今早阿Man喺低位亦撈咗些少指數重磅股博反彈，短線反彈阻力為19800-20000點，暫時都只能多做短線操作，尤其係美股形勢惡劣，一旦美股再有乜嘢冬瓜豆腐，港股難免被拖累，幸而係港股之前已自殘，跌先一步，唔少高估值嘅科網股，已調整咗一段時間，股價亦已回落至較合理水平，喺19500樓下分段買貨，已有一定值博率。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。