大戶力壓2月期指於低位結算
2月24日，天晴，天氣乾燥，日間天氣溫暖，晚上天氣轉涼，今晚要夜歸就記得著多件衫。美股維持反覆上落局面，標指守住3900支持，目前仍然係3900至4100之間上落，早段美股疲弱，收市前扭轉跌勢，三大指數收升，
由於反映通脹嘅數據回落速度不似預期，市場本來高漲氣氛難免受影響，不過息口喺5至5.5%見頂機會甚高，只係今年下半年減息機會不大，反而FOMC已預算明年先有機會減息1%，2025年再減多1%。至於油價及資源價格雖見回升，但升幅可控，未至對通脹帶嚟太大助力。反而工資增幅對通脹威脅更大，雖然工資增幅由去年8%回至約5%水平，不過美國就業市場仍強勁，首次申領失業救濟人數不足20萬，勞動力較為緊張，令工資仍有一定增長幅度。
踏入業績期，唔少重磅股已開始派成績表，雖然大部份嘅業績均見倒退，但以去年內地受疫情影響下嚴厲封城，大部份企業業績受影響亦係意料中事，主要係睇返今年嘅業務有冇條件復甦，所以去年嘅業績麻麻已變得唔重要。對於企業今年回復增長，答案大部份係正面嘅，而集團有否回購計劃，亦係另一個吸引市場關注嘅原因。不過即使有回購計劃，股價亦未必一定升，好似百度(09888)已公布50億美元回購計劃，但公司早前公布大搞AI，要做ChatGPT，然而內地則剛剛宣布唔容許內地網民用ChatGPT，至於原因你懂的，預計今日股價會受壓。暫時百度支持位喺130左右，若然因為AI概念而買入咗百度，留意130元不容有失，若然失守，都要嚴守止蝕，唔可以盲目期待。
港股整個2月處於調整浪中，1月大市見高位22700水平左右，但該水平剛好係過去一年四次反彈浪頂，未能攻破回調亦合理。同時港元喺1月中左右見有資金再度流出，人民幣匯價兌美元亦回落至6.91水平，外資流入A股亦未見積極。喺資金面轉弱下，市場氣氛自然受損。不過經過足足一個月調整，大市接近二萬水平，又重新出現吸引力，至於古天后都係集中返ATMJ、港交所(00388)等重磅指數股，一旦大市完成調整，呢啲股份將會率先反彈。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。