慎防2月下半個月波幅擴大
2月15日，部份時間有陽光，早晚清涼，但日間氣溫回升至20度以上。美股隔晚仍受壓，主要係俄烏局勢緊張下，金融市場難免動盪。有分析指除咗俄烏局勢影響之外，經濟前景滿布陰霾係令美股不振嘅主因之一，而美國已出現一系列衰退遺迹象，包括消費者信心，上周五公布的2月密歇根大學消費者信心指數跌至61.7，為2011年10月以來最低。另一衰退指標係債息曲線，即唔同年期美國國債孳息率嘅差異，當短期債券孳息率高過長期，則會形成「債息倒掛」現象，預示經濟衰退即將來臨。
目前兩期與10年期國債孳息的差距已收窄至不足0.5厘，「債息倒掛」或於今年中出現，並且喺下半年經濟開始衰退。隨着聯儲局開始「收水」並準備加息，債市亦出現異象。唔同評級嘅企業信貸息差正逐漸擴大，意味市場對部分企業的還債能力信心正下跌，若信貸息差進一步擴大，會對股市產生負面影響。目前道指重要支持區為34000點，要睇呢個位守唔守得住。
至於港股呢邊，之前兩次挑戰25000點失敗，噚日喺外圍地緣政治因素，同埋本地疫情嚴重，恒指全日跌350點，報收24556，剛好守住10、20及100日線嘅匯聚區24400點之上，預期呢個係短線支持位。不過2月份過咗一半，但波幅至今仍只有幾百點，似乎唔多啱大戶胃口，小心下半個月因為外圍局勢再起波瀾。暫時要睇住24400守唔守得住，一旦失守，好倉要先行撤退；淡倉方面則以25000為熊證重貨區，唔排除仲有機會上試呢個位去屠熊，暫時港股未有大方向，慎防2月下半個月波幅擴大，都係以輕倉為主。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。