港股回調反彈20日線為好淡角力之爭
5月28日，大致多雲，間中有驟雨，稍後局部地區月雷暴。隔晚英美股市休假，但科技股又傳來利好消息，據聞兩週後 蘋果公司嘅 WWDC 2024 發佈會，將公佈 iOS 18 會加入 AI 功能，可以直接召喚 OpenAI 嘅 ChatGPT，及 Google嘅 Gemini。今晚相關股份或借勢高開。大摩則睇好 AI PC 前景，微軟預估明年可搶佔 25% 市場份額，大摩則認為明年會達 16%，隨住更多企業要提升 AI 功能，未來幾年商用 PC 會出現大量換機潮，到 2028 年 AI PC 市佔率將達到 65% 之多。正因為呢啲原因，聯想(00992)近日強勢破頂，升穿52周高位。
值得留意係，前週當大市升穿 19000 點時，空倉補回引發成交增至 2000 億，但升至 19700，空倉補回力度減弱，成交由 2000 億縮減至 1564 億，反映高追新資金有限，上週4 日回吐市，成交更縮至 1200 億水平。回吐成交縮本來係好事，反映追沽沽壓並不大，但週一反彈，成交不足 1200 億，力度似乎麻麻。回吐仍未見新資金入市抄底，再睇睇升勢主要由中字股帶動，似乎係國家隊有心想將結算價推回 19000 水平，多於有新資金入場再掃貨。
至於阿里(09988)及京東(09618)，以發債進行回購，本來亦係利好，但股價卻調頭下跌，當然係春江鴨早收到風，先出貨。下週一至週三，香港會舉辦亞洲互聯網企業日，屆時多間企業龍頭會出席，即管睇睇重磅ATMJ 會否提新發展方向。過去 10 年，騰訊(00700)及阿里，都係互聯網企業嘅領頭羊，好多創新業務都係靠兩企注資後向上衝，但過去兩年阿爺連番打壓，令兩企龜縮，騰訊更出售京東(09618)、美團(03690)，阿里亦有意出售不停燒錢嘅六項業務，暫時睇唔到兩位大佬會有任何動作，即管睇睇今次會議中，會否為投資者帶嚟驚喜言論。
隔晚英美股市休假，不過港股昨日反彈逾百點，恒指成功收復20日線(18709)，於黑期時段反彈勢頭持續，逼近18900水平，料今早大市高開，進一步反彈或試回補5月23日遺下嘅上升裂口19024-19149，如能完全回補此裂口，並企穩裂口頂部，即成功收復10日線(19147)，有望再展另一升浪。不過近數個交易日成交額開始縮減，暫未見新資金流入，料反彈至19000水平附近已遇阻力，如未能重返19000關並掉頭再跌穿20日線，則回調持續，或於區間內上落進行整固。今日即市支持位為18700-18750水平，料18500-18550支持更大，若失此支持，則進一步回落回補5月3日遺下嘅上升裂口18217至18362，剛好亦為今年1月低位反彈至本月高位回調0.382黃金比18307；如回補此裂口後，未能守住18200關，或進一步回調至此浪段的回調0.5黃金比17875，亦接近日線保力加通道底部17575。至於即市阻力為19000-19050，升破則進一步向上挑戰19100-19150即日最大阻力，如能收復10日線企穩，則有望再展新升浪。由於周四為期指結算日，唔排除結算前，或於18300-19000之間進行轉倉，直至結算後，先有另一個新方向。
利益申報 : 筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。 免責聲明 : 本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。 版權聲明: 本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。