20/50/100日線形成匯聚區20200不容有失
4月21日，多雲，間中有雨，早段區部地區有狂風雷暴。美股隔晚偏軟，但下跌壓力又唔算大，主要係Tesla公布業績後股價跌近一成，影響大市氣氛，道指跌110點；標指下試4100支持，跌24點；納指則跌97點。美股仍處業績期，標指已公布業績公司約15%，表現好壞參半，市場傾向趁低吸納，股份無論業績好壞，股價高開則減磅，跌得咁上下，就有資金低吸。
Tesla唔單止係毛利率大跌嚇親人，更揚言繼續打減價戰，股價跌近一成，盤後股價喘定，目前回落至160美元水平，呢啲位都有得博下，但要預咗新能源汽車將陷入苦戰，隨後時間嘅新能源汽車股或變成有波幅，冇升幅局面。台積電亦公布咗業績，出嚟營收略差於市場預期，但每股盈利則略高於預期。不過整體而言，台積電呢份業績係唔錯嘅，管理層預計下季度收入約在152至160億元，主要是個人電腦銷售低迷，睇下去到第三季之後，能否回復增長。
至於銀行股方面，已陸續公布業績，經過上月銀行危機後，銀行已大大收緊借貸，銀行為自保，自動自覺提高存款比率，借貸唔再取進，預期經濟活動將因此放緩，睇下個油價走勢，喺OPCE宣布減產，油價仍然由83美元回落至77美元水平可知一二。不過目前中國已見通縮，內地工業生產出廠價格(PPI)仍是負增長，即使2月的官方及非官方PMI回升至50樓上，但3月又再回落，反映需求仍是相當疲弱。雖然3月貸款大幅上升，但資金並未見投放到工業生產中，更多資金係用作還債或拎咗去炒A股，生意淡薄，不如賭薄，呢個亦係A股近日回勇嘅原因。預期未來數月歐美需求會進一步回落，4月後中國再難以繼續「放水」，小心A股炒高又割韭菜。
港股呢邊真係無嘢好講，呢個星期成交縮水程況更為嚴重，日均成交徘徊1000億左右，試問一個欠缺成交嘅市場，邊有動力推得上。恒指已失10日線，而20、50及100日線，喺20250水平左右三線匯聚，一旦此匯聚區失守，即恒指下穿20200水平，下試250日線19700機會大增。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。