大市失守20日線或向下劏牛補裂口
隔晚美股繼續走弱，10年期美國國債孳息率周一升至2.79厘水平，創2019年1月以來最高，反映投資者預期美國加息步伐可能加快，將拖累估值高嘅科技股表現。以科技股為主嘅納指已經較近期高位回落約17%，標指更已失守20日及50日線匯聚區，走勢明顯轉弱。至於內地疫情惡化，上海已封城逾兩周，個別地區更已封城達一個月，港口擁擠嚴重影響供應鏈，當地經濟短期難免大受打擊。
不過阿爺都憂慮個市頂唔住，所以噚日有消息指內地監管機構窗口指導部份基金公司唔好淨賣出，以穩定市場，但A股噚日錄得4089隻股份下跌，而且跌勢頗為急勁。除咗出口術之外，阿爺都有出招嘅，收市再傳嚟網絡遊戲版號經過八個月冰封期後，再獲重新審批，多達45款網遊得到審批放行，個別手遊股今早高開，可惜高位無以為繼，高位回落升幅收窄，單炒消息當然追唔過。
阿爺出口又出手，恒指今早高開70點後，一度升幅擴大至221點，見21429半日高位，可惜20日線(21524)影都唔見，暫時難以扭轉弱勢。其後A股倒跌，恒指亦轉升為跌，半日最多跌197點，見21011點半日低位，不過21000呢個心理關口都有一定支持，就算假穿都可能會力守。半日恒指收報21101，跌106點；國指跌43點，報7164；恒科指跌33點，報4157。
藍籌股普遍向下，友邦(01299)半日跌1.8%，大笨象(00005)跌1%，似乎美息向上亦保唔住港股呢邊嘅金融股。至於股神老友芒格都炒唔掂阿里巴巴(09988)，較早前終忍唔住沽出部份持股，令阿里半日跌咗1.1%，其實都算跌得少。其他ATMXJ成員，騰訊(00700)雖然今次無份獲批新遊戲版號，但今次無份咪望下次，始終恢復審批係好事，股價半日彈2.3%。網易(09999)跟嗶哩嗶哩(09626)半日分別彈3.2%及7.4%。其他手遊股同樣開市被搶高，但半日升幅大多收窄，走勢上唔少都係開咗枝陰燭。
之前阿Man多次強調內房股最壞時間已捱過。內地逐步放鬆對內房股嘅管制，多個地區推出措施撐樓市，無奈今早大市高開低走，內房跟物管股半日多數下跌。不過對於有實力戰勝今次內房淘汰賽嘅內房股，回調可能就係收集好機會。
至於大市失守20日線好，走勢明顯轉弱，加上大量牛證於20000至21000之間集結，即使阿爺出招撐市，但喺缺水情況下，大市仍有機會先向下劏肥牛，順便回補3月16及17日之間所遺下嘅下跌裂口。不過終於阿爺開始關注A股走弱及疫情惡化將危及經濟，喺穩經濟大前提下，阿爺唔排除會放水減息降準。所以大市即使短期有回調，阿Man亦唔覺得上月中嘅底部18200會失守，可能今次回調至20000回補裂口已足夠。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。