調整浪中反彈 20日線能否收復為關鍵
美股隔晚表現反覆，隔晚美國公布嘅零售數據表現強勁，反映美國即使係唔少大型企業裁員下，消費市場亦未受影響。美國1月整體零售按月升3%，遠超預期升1.8%，係23個月來最大升幅，呢個數字出咗之後，美股早段下跌，主要係市場認為喺強勁嘅消費市道下，通脹雖見頂但未肯大幅回落，FOMC仍有條件加息。只不過美國就業市場，未見因為大企業裁員而轉差，除咗係美國仍有大量就業職位等緊人去開工之外，能源價格從去年高位回落，亦減少咗美國人民嘅財務壓力，暫時未見美國人因為失業而導致破產個案大增，市民目前仍願意花費，消費市道仍然理想。經濟數據反映美國今年陷入衰退機會較低，喺目前美股市場資金仍然充裕下，即使今年息率由美股雖反覆，但目前仍然喺接近高位徘徊。美股隔晚亦由跌轉升。
至於港股連跌四個交易日後，今日終見反彈，北水呢幾日亦有助攻，開始肯積極少少買貨，連續錄得淨流入，港股今日亦有個似樣啲嘅反彈，半日升逾400點，共重上二萬一水平，並成功收復10日線。恒指半日高開134點，升幅一度收窄至75點，見20887半日低位，但A股做好兼北水積極買貨下，大市回勇，愈升愈有，半日最多升481點，見21293半日高位。中午報收21292，升479點；國指升187點，報收7205；恒科指半日勁升4.1%，升178點，報收4467。半日成交額639.76億元，呢兩日成交由低位回升，雖未見太大增長，但總好過持續萎縮。
藍籌股普遍回升，金融股表現強勁，友邦(01299)、港交所(00388)、國壽(02628)齊齊升逾2%；平保(02318)半日更升3.2%；內銀股則錄得1%左右升幅；而大笨象(00005)半日升0.7%。噚日急回嘅安踏(02020)，盤中跌幅收窄，以一條長下影線收市，今日反彈1.4%，但仍未完全回補下跌裂口。至於比亞迪(01211)半日亦升1.1%，但吉利(00175)本身處於近日低位，同時亦接近短線支持，半日反彈力較比亞迪好，彈咗2.7%。
要數今日推動大市反彈嘅功臣，當然係科網股最突出，ATMJ全線向上，當中以京東(09618)半日彈7.5%最勁，亦係升幅最大藍籌股；騰訊(00700)跟美團(03690)半日升逾3%，阿里(09988)半日亦錄得近4%升幅。其他科網股全線向上，升幅超過1%至7%不等。內房物管股日升日跌，噚日回咗今日又跟市升，已引證之前阿Man所講，呢兩個板塊將會一段日子有波幅，冇升幅。另外中資電信股今日表現亦強勁，三股齊齊升至52周新高。
大市由22700回落至20800水平，跌咗1900點，調整完成與否，就要睇收復10日線後能否企穩，而20日線21640係下一個關鍵位，若然升至該水平再度掉頭，10日線得而復失嘅話，咁調整仍要持續，向下補20200裂口，甚至考驗250日線嘅機會仍存在。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。