【古天后日誌】 美羅素2000創新高後見頂機會增(220925).docx

美羅素2000創新高後見頂機會增 美國聯儲局於上周FOMC會後宣布減息0.25厘，聯邦基金利率降至4厘至4.25區間。聯儲局自去年12月18日以來首度減息，市場憧憬由去年9月中旬啟動嘅減息周期將會恢復。聯儲局點陣圖亦顯示，局方估計利率到年底中位數為3.6厘，亦即係預示喺今年10月(28至29日)及12月(9至10日)今年餘下兩次FOMC會議都減息0.25厘。不過聯儲局主席鮑爺其實未有太鴿，佢喺會後聲明表示，短期面對通脹上揚以及就業市場惡化風險嘅挑戰性環境，未來利率走向需要喺每次會議單獨處理。事實上，面對刺激就業(預防衰退)抑或遏制通脹如何取捨嘅兩難局面，聯儲局19位有投票權嘅官員，有7位預料今年唔會再減息，而另有兩人則預料只會再減息一次。 雖然利率前景尚未完全明朗，但聯儲局今年首度減息已刺激美股三大指數又再破頂，就連反映小型股表示嘅羅素2000指數亦於上周四，相隔4年後再創歷史新高。羅素2000目前追落後破頂，根據過往美股表現，炒到小型股好多時係大市見頂先兆，提防華爾街隨時喺超買或借其他任何藉口下回調，包括參議院日前否決臨時撥款法案，聯邦政府部分機構9月底有停擺風險等等利由，進行較顯著調整。屆時定必拖累全球股市進行回調，中港股市亦難獨善其身。 睇返港股上周於聯儲局議息前後破頂，上周四早段恒生指數一度高見27058逾四年高位，但同日一度倒跌586點，即使最後跌幅收窄至364點收市，但當日形成一支穿頭破腳大陰燭，成交額更增至4133億元，為今年4月8日以嚟最大成交額，大成交配合穿頭破腳大陰燭為利淡形態，後市進一步調整亦無可厚非。以本月初低位25013計算，升至上周高位27058，月波幅已逾2000點，月波幅已滿足，下周期指結算及月底季結，不排除港股將出現回調整固。目前5日線已上移至約26600水平，而大市已兩日收於其下，今日大市向下考驗10日線約26400水平機會極大。如跌穿10日線，料後市進一步向下考驗26000心理關口，25850即20日線為本周重要防線。除非大市能企穩26600水平，否則再向上機會不大。留意26850-26950為上周重要成交密集區，如持續困於此水平之下，即使港股不作較深度調整，暫時亦難以再創新高，料先作整固，強勢則於高位橫行，但由於上周無論周線出現針頂回落，抑或周四日線穿頭破腳均為利淡訊號，一旦再跌穿10日線，向下作較深度調整機會大。