【古天后日誌】 新股熱炒資金繼續炒股唔炒市(200525).docx

新股熱炒資金繼續炒股唔炒市 5月20日，大致多雲，局部地區有驟雨，日間短暫時間有陽光及天氣炎熱。美國遭評級機構穆迪下調信貸評級，重燃市場對美國資產憂慮，美國30年期長債孳息升穿5厘心理關口，拖累美股低開，道指更一度跌逾300點。不過大摩又嚟魔笛追魂，建議投資者趁低吸納，三大指數最終扭轉跌勢，道指升137點或0.32%，報收42792；標指連升六個交易日，倒升5點或0.09%，報收5963；納指則升4點或0.02%，報收19215。 重磅股中，蘋果公司及Tesla股價曾分別下跌3.3%及4.7%，收市跌幅收窄至1.2%及2.3%；Nvidia早段跌2.2%，收市倒升0.1%。摩根大通舉行投資者日，維持今年淨利息收入預測不變，股價跌1%。大摩策略員Michael Wilson認為，中美貿易戰暫停有助降低美國陷入經濟衰退機會，最新一季業績顯示，關稅嘅不確定性未有造成重大影響，近期盈利預測上調將有利股市升勢。摩通發表報告指出，穆迪下調美國信貸評級長遠而言將導致當地利息成本上升。市場仍擔心美債前景，美國30年期債息一度抽高9.14個基點，高見5.0353厘，創2023年10月以來高位，10年期債息曾上揚12.7個基點，報4.566厘，但其後都蒸發大部分升幅。美國國家經濟委員會主任哈塞特於訪問中批評穆迪降級行動屬滯後，只着眼前朝拜登政府沒有節制嘅支出而作出懲罰，又稱華府現時已削減開支及放鬆營商政策，揚言美債係全球最安全資產。美滙指數一度下挫1.02%，低見100.064，日圓上升0.71%至144.67兌每美元；加密貨幣「一哥」比特幣倒跌1.92%，至102108美元。瑞穗宏觀策略主管羅徹斯特說，雖然唔會太過強調今次降級嘅重要性，但會加強去美元化嘅論述。 昨日恒指低開188點後，曾跌285點低見23059，其後收復失地，曾倒升57點，高見23402，最終全日跌12點，報收23332，全日成交則縮減至1847億元。昨日內地公布經濟數據不過不失，而重磅股公布業績後，股價則個別發展，形成大市處於跌唔落，但又難以向上突破悶局，市場傾向炒股唔炒市，尤其新股及半新股較受市場歡迎。預計今日首日掛牌嘅寧德時代(03750)亦會成為熱炒股，昨日暗盤較招股價升9%，令人值得期待。預期寧德時代將帶動市場氣氛，而隔晚夜期及ADR升逾百點，今早黑期已逼近23500大關，料今早大市高開，能否高開高走，則視乎資金流向。資金繼續集中炒新股，抑或願意將資金投入買重磅股，成為關鍵。恒指短線好淡分界線仍為5日線約23375，即23400企穩與否成為升跌關鍵，此關亦為今年升浪反彈黃金比0.764；而初步支持為10日線約23150，50日線22800及20日線22500支持更大。阻力方面，初步為上周高位23700，下一阻力為100周線23915，自2021年至今，大市未曾有一個月能升穿100月線企穩收市。如本月企穩於100月線收市，後市再創年內新高機會甚大。