【盤房來料】 港股悶局未破 成交欠奉續陰乾(201026).docx

港股悶局未破 成交欠奉續陰乾 噚日香港假期，而美股噚晚個別發展，人工智能(AI)股反彈，加上布蘭特期油價格自5個月高位回落，科技股帶動回升，納指一度升1.81%，標指最多升0.94%；道指則反覆偏軟，低開23點後，倒升最多132點，高見52134，但最終輕微回吐36點或0.07%，報收51966；標指升31點或0.41%，報收7690；納指升290點或1.11%，報收26430。 上周五阿Man出咗街，個短炒倉基本星期五無處理過，反而係噚日先處理下， LITE盤前見900上唔返，擺定個870止賺盤，免得均價815嘅貨又運吉，結果當然係870落咗車。夜盤又落返830樓下，暫時唔擺買盤住，若然再甩底，要睇780-800個防守位點樣。晶片股中，Nvidia及超微半導體股價分別升1.4%和1.7%；摩根大通調高Intel評級至中性，表示公司可能需要數年時間翻身，但管理層執行能力穩健，INTC回升2.4%；總算守到90，但阿Man嘅短炒貨仲係坐緊艇。亞馬遜飆升5%，Tesla上揚3.8%，長線倉叫做有啲進帳。MU好彩喺930減咗啲貨，仲有一注860短炒貨未走，暫時都係用個880做防守睇住先，千祈咪再甩底穿858上周四低位。NBIS均價190嘅貨仲未走，160嘅買盤亦唔中，暫時個買盤仍然等緊，150防守價不容有失。ALAB仍然守住280，今晚都係睇住呢個位，穿280嘅話，下一級要落返去250。MRVL情況差唔多，230收市叫守到，但240兩條線企唔到，又係捱打中。DELL均價492嘅貨今次買大咗，貨太多有啲頂唔順，470減咗啲貨，當然係輸住走，但DELL之前食到個大升浪，當係獲利回吐，今晚上唔返460，都係濕滯。 摩根士丹利策略員Michael Wilson表示，過去數月股市部分領域回調接近尾聲，投資者應準備好買入股票。大摩仍然偏好優質股，估值調整受到衝擊主要係金融、工業及非必需消費品等對經濟敏感產業。事實上，雖然AI泡沫疑慮觸發近期相關股份遭拋售，但從市盈率呢個指標睇，市場並未出現上一次2000年科網泡沫時期明顯泡沫跡象，因為市場預期企業盈利將爆發式成長，以致標指及納指100指數等基準指數預測市盈率今年實際上有所下降。回顧2000年市場見頂前一個月，標指中最大5家科技公司，平均預期市盈率約達65倍；相比之下，如今五大科技公司相關數字只有約23倍。NQ今晚分水嶺29750，支持29650/29550/29450/29350-29300，阻力29850/29950/30050/30150/30200；留意29800要企穩先有得彈。 美國10年期債息曾漲5.65個基點，至5.1293厘，對息口較敏感嘅2年期債息升5.3個基點，至4.7613厘。白宮經濟委員會主任Kevin Hassett周一向CNBC表示通脹受控，但9月份通脹數據顯示仍有工作要做。俄烏衝突升級，加上示威加劇市場對法國財政疑慮，歐元曾挫0.52%，至1.1182美元。美滙指數一度升0.24%，報102.08，日圓跌0.35%，低見158.56美元。 上周港股窄幅爭持，一周波幅不足600點，長周末假期前報收24186，險守10日線，但仍處於多條平均線之下，按周計微跌25點。目前港股隨外圍股市上落，惟反彈動力明顯不足，技術走勢上，20日線阻力重重，上方50日線及100日線持續向下，大方向反覆向下形態未改。周五假期前，夜期回落至24100水平，較周五假期前略為低水，今早黑期進一步一跌，於24000邊沿爭持。今早恒指低開196點，報23990，跌幅略為收窄彈到24035，可惜24000得而復失，A股繼續走軟，港股跌勢又擴大至最多278點，低見23908，其後喺24000上下100點之間增持。恒指半日收報23956，跌229點或0.95%。大市半日成交1020.77億元，北水淨流入13.92億元。港股暫時半日波幅不足150點，悶局一場。 留意24000心理關口再度失守，午後若未能重返24000企穩，料先往23800/23600尋找支持。反彈方面則阻力重重，大市重低阻度需要企穩20日線即24420，並重上100日線即24800水平，港股方能扭轉目前弱勢。雖然北水上周仍見流入，但周五當日則錄得爭流出逾30億元，可見北水目前亦較為審慎，以守為攻。目前港股悶局未破，成交持續低迷，陰乾格局未改。內地昨日公布三頭馬車經濟數據，大致上與預期相近，未有驚喜。展望本周，開始踏入業績期，無論美國或港股均見有大型企業公布業績，相關業績公布或會掀動市場情緒。