港股後市關鍵為20日線約21700至21800
2月10日，大致多雲，早晚有薄霧及一兩陣微雨，下午部份時間有陽光及較為溫暖。美股近日表現反覆，一如所料，美股業績期過後，又返炒息率走勢，跟住FOMC官員嘅言論上落。隔晚美股三大指數回落，標指再度重返4100之下，美股較早前借業績炒咗個媿星期，近日啲龍頭股已無以為繼，雖未至打回原形，但亦欠進一步上升動力，是以美股開始表現反覆，就標指而言，可能又喺4100呢個水平，上下一百點上落。
美股短期要再向上突破，只有靠利率回落，當股票回報率高於銀行存款收益，又或者股票盈利增長上升，拉低市盈率，令股市變得更吸引，否則美股暫無條件進一步向上突破。雖然早前市場憧憬聯儲局或於今年減息，但見近日油價跟資源價格回升，估計喺Q2甚至Q3，美國仍未有減息條件，直至通脹威脅全數減退，聯儲局先有望從目前嘅貨幣緊縮政策轉向較寬鬆政策。
至於企業盈利表現方面，今年美國經濟能夠成功軟著陸已經要燒炮仗，今日美國經濟唔陷入衰退，出現橫向走勢已經收貨，咪幻想出現V型大反彈。目前市場普遍預期上半年標指企業或錄得輕微負增長，至下半年才有望改善回升，亦即係股市靠企業盈利增長拉高回報率，似乎係主觀願望居多。即便如此，美股又並非欠缺投資價值，而係取決於買入時機，美股大方向係逢調整吸納，目前標指接近4100水平，值博率唔算吸引，要買入美股，都係等標指回落至3900水平再作考慮。
至於港股亦然，當大市升破22000水平後，市場嘅醒目資金選擇獲利沽貨，近日成交縮減，反映已獲利資金暫時仍未願意重返市場。值得留意係條10日線(21654)跌穿咗20日線(21758)之際，50日線(20418)則升穿咗250日線(20151)，咁今日大市走勢變得相當關鍵。噚日大市由21100水平全日反彈開出大陽燭高收，若然今日大市重返20日線企穩，或能阻力10日線進一步下移，咁呢一輪調整或者完成再展升浪，但睇成交就唔多配合，調整完成較難成立。相反今日大市未能重返10日及20日線之上，10日線持續向下，大市調整持續，首個目標仍然係20800點，下一目標為50日線及250日線。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。