忍手過新年 2023再戰江湖
12月30日，天晴乾燥，早晚天氣清涼。美股隔晚反彈，唔多唔少因為年結關係，三大指數上升，道指升345點；標指跟納指分別升65點及264點。不過喺假日情懷下，美股成交偏弱，缺乏資金支持下，美股暫時只係日升日跌嘅狀況。標指暫時守住3800點，之前3900點支持變成短線阻力。10年債息回升至3.8%，市場對息口走勢嘅極度樂觀情緒不再，不過VIX保持喺22水平，市場未見出現恐慌，目前大家係計緊有冇值博率嘅股份先考慮入場。
好似蘋果公司，跌穿咗6月份低位129美元，即見資金撈底，股價反彈2.8%，雖然今年iPhone14銷售不似預期，但由於蘋果公司現金流強勁，以前目10年債息3.8%計算，21倍PE嘅蘋果公司仍有一定吸引力。不過當息口繼續向上，升破4%，蘋果嘅吸引力亦會下降，相反息口向下，蘋果就會變得更為吸引。至於另一隻大家較為關注嘅股份係Tesla，其股價自跌穿200美元心理關口後，跌勢加劇，散戶資金不斷入場接貨，股價卻繼續跌跌不休，派發現確切地出現，只係散戶未能接受。不過任何一隻股份，只要有一定基本因素支持，去到價值再度變得吸引時，自然再有聰明資金入場撈底，而Tesla跌至108元，保持三位數大關，即見資金入場，股價反彈重返120美元水平。估計Tesla需要喺110美元至165美元水平之間進行收集，未來一段時間都係有波幅，冇升幅。
至於港股雖然噚日結算日略為下跌，但仍守住多條移動平均線，表現已算唔錯，隔晚夜期跟ADR更隨美股回升，今日有望重返二萬水平作年結。只係假期效應下，成交縮減至907億元，市況淡靜，買賣兩閒。1月份基金將從新進行配置，而下周四騰訊(00700)將送出手上美團(03690)股份，預計獲得最多美團嘅騰訊主要股東南非基金Naspers將沽出美團套現。過去騰訊多次以回購抵抗非南股東減持，但美團暫未宣布任何回購計劃，一旦南非佬狂沽美團，大市有可能借此機會回調，不得不留意。另一方面，內地將於下月8日全面通關，但目前多國開始對中國居民入境作出限制，呢個會否成為風氣，影響大市氣氛，開關會否引起全球再次大爆疫情，暫時仍屬未知數。再者，1月份為農曆年假期，傳統過年前銀根會較為緊絀，1月份難以寄望阿爺再開水喉，反正又係新人長周末假期，全不如今日都忍忍手，待下周假後再作部署。祝大家新年進步，古天后將於下周出遊，趁內地未通關去日本打個轉，下周二至周五本專欄休假暫停，至1月9日回復正常，2023再戰缸湖。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。