港股關鍵為20及50日線交匯處
11月28日，大致多雲，初時有幾陣雨，日間仍然溫暖，留意過兩日天氣開始轉涼。上周五美股只有半日市，市場等待Black Friday數據，道指升152點，但標指跟納指下跌，標指要突破4100阻力唔容易，尤其上周成交縮減。至於科技股目前仍然跑輸，龍頭之一嘅Tesla見反彈，可惜目前仍未重返10月低位202美元，目前仍較該水平低一成，弱勢未改。10月債息已跌穿3.7%，VIX亦降至20.5，美股波腷有所收細，波幅縮減有利資金流入。
上周Black Friday網上銷售增長2.3%，但好過預期增長1%，電商仍對今日Cyber Monday銷售有信心，但實體店人流減少，料線下銷售或錄得倒退。銷售數字將影響今晚美股外，10月多家大型科企裁員，市場更關心週三晚小非農及週五晚非農數字。週四晚亦有鮑爺發表講話，唔排除繼續放鷹去管理市場情緒，同晚亦會公佈核心PCE，由於核心CPI已快速下降，市場預期PCE將由5.1%降至5.0%。其實早前美股已借CPI炒上，除非PCE出現反高潮不跌反升，否則對美股應該唔會有太大震盪。
講返中港呢邊，阿爺喺周末宣布降準0.25%，預期可釋放5000億元新資金，不過市場預期降準0.5%，即係放水幅度遜預期，古天后認為係人民幣唔強起嚟，內地好難大大力放水。不過有水放總好過無，加上上週6大行向內房新批貸款額度已達1.2萬億元，內房跟物管股已見偷步炒上。暫時阿爺雖無特別政策指令，逼使內銀救內房，但內房破產，內銀係最大受害者，所以內銀自救都要放水畀內房buy time，吊住唔死。只係內房仍有大量隱藏債務，內銀放水救內房，暫時治標，但未能治本，內房前景仍未明朗，要內房真正起死回生，非得要內地樓市好起嚟。但內地一日唔對防疫政策鬆綁，內地樓市難以救活。
至於港股，喺內地疫情再爆發下，周末多個城市出現反抗封禁示威，尤其多間大學學生上街示威，預期今日中港兩地股市必見震盪，預期大市將回試20日線(17038)跟50日線(16956)支持，呢兩條線交匯之處，將會係好友力守嘅重要橋頭堡。留意呢個位可以假穿，但不能失守，一旦失守港股由14600開始反彈延伸嘅上升軌失守，港股反彈亦告一段落。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。