港股20700頸線能否守穩決定後市去向
7月19日，部份時間有陽光，有一兩陣驟雨，天氣仍然酷熱。美股隔晚先升後跌，早段道指一度升逾300點，但高開低走，至收市倒跌215點收市，標指跟納指均於早段升抵阻力後無法再突破而掉頭，收市分別倒跌32點及92點。美股仍未擺脫日升日跌，甚至係半日升半日跌嘅反覆格局，問題係目前美股回軟係反映市場憂慮經濟增長放緩，甚至陷入衰退，但仍未反映經濟或出現「深度衰退」，而美國經濟衰退率持續升，即使美股偶有反彈，仍未走出熊市困局。
美股早段因為高盛業績優於預期，但實際上水EPS跌49%，唔講得上係乜嘢嘅好嘅業績。而6大投行均已公布業績，喺今年投資氣氛逆轉下，銀行股收市大不如前已屬意料之，加上要有壞帳撥備上升嘅準備，銀行股大方向當然係走軟。雖然銀行股已累跌唔少，但細摩跟花旗已表示要擱置回購計劃，主要係需要預留更多資金，以應付壞帳上升，連回購呢招殺手繝都要收埋，睇嚟美股嘅銀行股有一段時間無運行。
美元強勢持續，歐元兌美元跌穿1算，歐洲市場難免弱化，歐元疲弱令歐洲各國貿易逆差壓力上升，強如德國亦面對呢個問題，其何況係其他財政較弱嘅歐洲國家。除咗歐洲國家表現疲弱，新興市場呢邊喺強美元下，債務壓力上升，通脹更以坐火箭速度向上，部份新興市場國家通脹以雙位數字上升，難怪有對通基金已開始沽空歐洲及新興市場股市。
全球資金流向美元，港元亦面對資金流走壓力，金管局週一收市後接了55億港元沽盤後，紐約時段再接80億港元，自5月起本港已錄得1465億港元流走，銀行結餘系統跌穿2000億港元，一旦資金進一步流走，而銀行結餘進一步跌穿1000億水平，港息不得不跟隨美息上升，同時要始面對流動性減弱嘅日子。
港股喺經過上周連跌五個交易日後反彈，當全世界都認為恒指將要失守20000大關之際，恒指噚日略穿20300點後反彈，重上20600-20800水平，留意20700點為恒指日線圖頸線之所在，恒指需要先守穩20700點，先有扭轉近日弱勢嘅可能。預期喺噚日大市急彈後，今日大市或需要喺20600-20800水平爭持整固。雖然內房斷供問題持續發酵，但中央對此高度重視，同時命各大銀行向房企伸出援手，先解決大量項目停工問題，亦給予業主供款緩衝期，即管睇睇斷供問題呢個火頭能否及時熄火，若問題繼續惡化，港股想進一步反彈，亦有心無力。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。