港股確認回調目標先睇20800-21000
2月2日，短暫時間有陽光，早上清涼，稍後有一兩陣雨，有時風勢較大。隔晚美股個別發展，由於三大央行，包括美國聯儲局、英倫銀行及歐洲央行加息幅度合符預期，鮑爺又無再放鷹，對息率敏感嘅高增長股做好，而重磅科技龍頭業績公布後，亦得到市場認同，科技股升勢顯著，納指隔晚升逾3%，高收12200；標指升60點，高收4179。暫時已第二日收於4100阻力位之上，道指則跌39點。反映中概股嘅金龍指數跌逾1%，拖累港股ADR跌164點，夜期回落曾至21800水平，收21929。預期今日港股低開，10日線噚日再度失守，今日料再考験21800低位，若然此關再失，短期下試20日線，即21400水平機會大增。
隔晚出現西升東降嘅情況，扭轉上月美股回吐時，中港股市照升可也嘅情況，主要係重磅美股公布成績表市場都收貨。即使唔少大型企業大規模裁員，但與此同時，美國仍有過千萬就業職位係有工無人做，美國就業市場未有惡化。而從各方面嘅經濟數據分析，美國陷入經濟衰退嘅機會亦唔高，就連鮑爺亦開口表現，美國經濟應該可以軟著陸，資金自然會較為進取。
尤其美股目前唔少股份，已較高位大幅回落，估值已變得相對合理，而過去一兩年，投資者投資內地企業，面對嘅政策風險，已嘗過唔少苦頭，當然喺美國經濟唔會陷入衰退之下，寧願畀多少少溢價，都較願意投入美股。雖然目前內地政策風險似乎已大大減退，對科技企業嘅監管亦靠一段落，但隨住馬雲淡出阿里(09988)，騰訊(00700)又多次出售旗下眾多科技投資項目，可見未來內地大型科企嘅增長，已難以跟過往相比，即使港股嘅大型科技，估值已相對高位變得合理，但相對美企仍會出現一定嘅政策風險折讓。
至於港股由10月低位反彈至1月高位，反彈幅度達五成，23000未能突破企穩，呢一輪升浪亦已到回調嘅時候。古天后早兩日都講過，以整個升浪嘅回調黃金比0.382計算，回返3000點左右，去到20000水平，即係250日線20200左右，剛好係形成大型頭肩底形態嘅右肩部份。如此一來，現貨有心買貨，暫時唔需要心急，調整仍然繼續，暫時就先等大市考驗20日線，大約係21687，守唔住條20日線，個市點都要下試20800至21000補裂口。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。