【盤房來料】 侵侵搞搞震 資金避險金價再破頂(210126).docx

侵侵搞搞震 資金避險金價再破頂 美國總統特朗普欲謀取格陵蘭，事件發展至美歐可能再爆發新一輪關稅戰，導致周二美股假期復市後插水，美股三大主要指數全線下跌，道指周二裂口低開354點後拾級而下，跌幅曾擴至最多931點，道指收市跌幅仍達870點或1.76%，報48488；標指跌143點或2.06%，報6796；納指急跌561點或2.39%，報22954。除咗股市之外，債息升債價跌，美匯走軟，反映資金正離開美元資產，美國股債匯三殺，而金價則再破頂。美股急跌拖累夜期及ADR走低，反映中概股嘅金龍指數亦跌逾1%，今早港股亦跟返個夜期低開。不過A股表現硬淨，恒生指數低開後即收窄跌幅。半日恒指跌39點，報收26447，半日成交額僅1276億元，似乎喺侵侵搞搞震嘅情況下，資金傾向避險，唔係咁想買股票住。 至於美股噚日阿Man都叫咗要留意固VIX，個VIX上過20+之後升勢回順，暫時喺20邊徘徊，咁啱個NQ就係跌破咗25400之前個上落區間25400-26000底部後，順勢下試100日線，落到去25100搵支持，果然係25100水平就反彈，暫時喺亞洲時段，NQ彈到25200水平左右，呢個位正正係條20周線。今晚若然急跌後見反彈，NQ首個反彈阻力係25400-25450，除咗係之前上落區間嘅底部，亦係50日線，由支持變成阻力；而下一個較大阻力位係26650-26700，即係10日，20日同30日線匯聚區，上唔返呢幾條線，NQ就確定弱勢已成，之後可能只有波幅，無升幅。至於個股方面，噚日畀咗MAG 7嘅支持同阻力位，暫時可以睇住個區間炒下上落。至於短炒資金仲係留咗喺太空板塊RKLB、ASTS、PL；稀土板塊MP、CRML、USAR同埋無人機ONDS呢堆嘢，但呢堆股之前炒得過勁，暫時呢啲板塊仲係跑贏大市，但累積升幅太多，都係忍下手好。RKLB之前逼近99啲食糊位，呢兩日落返90邊，吼位睇下有冇85美元撈下貨，80至82美元短線有不俗支持。不過今年收入同盈利增長可能放緩，但係呢啲價應該都反映咗，一旦美股再有深啲調整，唔覺意跌穿80呢個支持位，下一個大支持區域就會喺72附近，有呢個位入到場，中長線贏面就大。 雖然內地近公布嘅經濟數據尚算想，更推出定向減息，即使融資比例有所調整，中港股市上周仍於高位整固，但周末期間美國總統特朗普於周末期間表示要收購格陵蘭，並對反對此舉嘅歐洲八國加徵關稅，消息令周二假後復市嘅美股急跌，而其他股市喺地緣政治局勢變得緊張，及充滿不確定性下普遍下跌，港股亦不例外。昨日港股連續第四個交易日下跌，恒指低開19點後，早段曾倒升74點見26638高位，其後回復跌勢，跌200點見26363低位，收市跌幅收窄至76點，報26487，成交額2377億元。港股上周雖高見27200水平，但本周一卻以巨大下跌裂口開市，雖然即市跌裂口收窄至26715至26741，但昨日反彈明顯受制於下跌裂口之內。繼上周遺下上升裂口26608-26729後，竟以下跌裂口回補上升裂口，令日線圖出現一個孤島形態，除非今明兩日內，可重返裂口頂部之上，即重返26750水平，否則受限於孤島形態下，港股將轉勢偏淡，下試20日線約26300水平，一旦失守則往50及100日線匯聚區，約26100尋找支持。如無法重返20日線企穩，並失守26000理關口，大市或進一步往日線保力加通道底部即25400-25500水平尋找支持。幸而A股常算硬淨，恒指暫時仲守到26400，留意失守26400並下破26300失20日線，則往50及100日線尋找支持就無乜懸念。個股方面，可以留意下中國平保(02318) 預期壽險股將迎來歷史性機遇，因民間財富有機會再從新配置。公司長端利率企穩、「險資入市」持續推進，資產端改善趨勢明確，保險板塊有望迎來價值重估，公司有望持續受益。中國平安作為內險股龍頭，為進可攻，退可守嘅高股息標的，值得加大配置。