【盤房來料】 市場靜候美伊談判結果買賣兩閒(210426).docx

市場靜候美伊談判結果買賣兩閒 中東緊張局勢又再升級，伊朗重新封鎖霍爾木茲海峽，而美國海軍亦扣押懸掛伊朗國旗嘅船隻，曾刺激油價再度回升，但今早紐約期油於亞洲時段略為回落至86美元水平。至於美國副總統萬斯周一飛往巴基斯坦與伊朗展開談判，總統特朗普揚言如果未能達成協議，唔會再延長停火時間，並指持續關閉霍爾木茲海峽。不過侵侵一向五時花，六時變，隨後又指談判倘有突破，願與伊朗領導層見面。美股周一表現反覆，道指低開25點後，跌幅擴大至最多201點，低見49245，收市跌幅收窄至4點或0.01%，報收49442；標指一度回吐0.58%，收市跌幅收窄至16點或0.24%，報收7109；納指曾跌1.01%，收市跌幅收窄至64點或0.26%，報收24404，13連升終止。 雖然美股三大指數有少少回吐，但整體美股仍維持強勢，ALAB喺盤後升破185美元，繼續將止賺位再推高少少去到170美元，不過170美元至180元已經係合理價，想減貨或者食糊，都可以隨時起筷。NBIS喺150美元似乎有唔錯支持；ONDS穩步回升，上返11.5-12.5美元先考慮減返短炒撈嘅貨。NFLX就真係要時間等，暫時似喺90-100美元慢慢築底，守到90美元，按兵不動。RDW呢啲價其可以買返啲，9至9.5美元做防守，博上返12美元。CRWV同樣係繼續持有，目標係睇返120-125美元先，防守位不變喺110美元。至於NQ都算強，噚晚基本無穿過26600，今晚個分水嶺喺26750，支持26650/26550/26500，阻力係26850/26950/27000，經過上周五咁大波幅，估計呢兩日波幅會收返窄啲，等待美伊新一輪談判結果。 至於港股呢面，市場仍關注美伊局勢發展，但戰事消息對股市影響正逐步退減，港股經過上周五回吐後，昨日回升，恒指高開44點後，雖然早段曾倒跌65點，見26094半日低位，但50日線及100日線未受考驗，其後回復升勢，恒指最多升251點，見26411高位，全日則升200點或0.76%，報收26361，成交額2414億元，成交保持近日平均數量。今早黑期喺26500水平徘徊，恒生指數高開81點後，一度升125點見26486高位，但因為A股走軟，拖累港股曾倒跌19點，中午恒指維持33點升幅，於26400水平好淡爭持，報收26394，升33點。國企指數升7點或0.08%，報8906；科技指數跌37點或0.73%，報5028。大市成交1087億元，買賣兩閒。油價是目前衡量中東戰局嘅重要指標，不過市場仍相信美伊衝突最終可以解決，只要紐約油價維特於90美元之下，市場風險胃納可望再度擴張，帶動恒指重返二萬七大關。至於恒指短線支持為25900-26000，25700下一支持，25500即10日線為重要支持。