港股乏力彈 表現全球包尾
有消息指美伊短期重返談判桌，美國債息及國際油價從高位回順，美股周三拾級而上，道指低開15點後，最多反彈703點，高見50067，收市略為回順，升645點或1.31%，報50009；標指升79點或1.08%，報7432；納指升399點或1.54%，報26270。高盛急彈5.8%，為升幅最大道指成份股，收報982.12美元創歷史新高。亞馬遜升2.2%，蘋果回升1.1%，英特爾急升7.4%，美光再升4.8%。油價回落，雪佛龍跌3%，為表現最差道指成份股。Nvidia周三收市公布的業績，股價收市升1.3%，分析員估計上季收入將大增80%，投資者更注視該公司如何提升生產，以及應對競爭加劇。業績公布雖然略超預期，但股價反而略為回軟，盤後於220美元水平徘徊。
噚晚美股又係開心時刻點食都得，首先ALAB雖然喺250美元落咗車，藝高人膽大，見240-245美元唔穿, 上返248美元又追返入，不過開市急急上到270美元，又忍唔住食糊，以為點都有少少回吐博去返260-265又撈返，可惜今次游咗出公海，完全撈唔返就再上280美元以上，盤後更逼近290美元，呢次ALAB嘅教訓下穿咗頂唔好估頂，乖乖地推高個止賺，繼續持貨就係。MU反而游水成功，開市無耐735減返注，擺返個700同675撈貨，結果中返個700，一覺瞓醒盤後上返750之上，今晚睇位個750-770又可以開餐。其他CRWV都係無畀個95再加注，繼續持有先，唔想太急再加注。GOOG等到個380-385加注，382加多一注，防守睇住個350-360。INTC急升逾7%，暫未有打算落車，呢隻真係想等130至150先算，NBIS盤後上返200，穩步回升，暫時支持位上移至185-190。NQ繼續有波幅炒，噚日個29000守得幾好，再出咗個美伊再講數消息，加埋資金繼續追捧科技股，NQ上埋29400。今晚個NQ分水嶺29300，支持29200/29100/29000，阻力29400/29500/29600，暫時又唔見得可以再爆頂上破29800，皆因Nvidia出完業績又無乜驚喜，科技股係炒個別，重磅七雄呢期表現較呆滯。
港股昨日低開88點後，一度跌242點，見25555全日低位，但並未有重返周一低位，而250日線最後亦失而復得，收市跌幅收窄至146點，報收25651，已連續三日守於250日線即25600水平之上，成交額2620億元，則未見有更多資金於現水平入場買貨，成交動力略嫌不足。至夜期時段，有消息指美伊協議文本獲得進展，有望於短時間內公布，美伊將再重啟談判，消息刺激金價回升，油價回落，至今早亞洲時段，紐約期指重返100美元之下，而金價則企穩4500美元水平。美股三大指數回升，夜期一度升逾200點，而ADR則高水逾百點，今早黑期亦企穩於25700水平之上，恒指今早高開182點，報25833，開市價正正係半，隨後升幅逐步收窄並倒跌，最多跌34點，低見25616點，半日收報25648，跌2點或0.01%，半日又係以全陰燭姿態出現，港股乏力得可憐，當日、韓股市因為個油價回吐兩個股市都急升，日經指數升逾3%，韓國綜合指數午後升幅更擴大至7%以上。港股目前表現係全球包尾，跟升唔跟跌，所以阿Man都好少再炒港股，集中啲彈藥炒美股，人生會覺得美好啲。
Administrator
2026年5月21日