【盤房來料】 市寛背馳 港股反彈或已近尾聲(210726).docx

市寛背馳 港股反彈或已近尾聲 美股周一先升後回軟，晶片股暫時喘定。道指高開8點後，升幅曾擴大至265點，高見52411，但其後因波音及蘋果公司股價回軟，道指掉頭回落最多364點，至51781，收市則跌307點，報收51839。標指一度升0.74%，收市倒跌14點或0.19%，報7443；納指微跌12點或0.05%，報25508。 NVDA股價曾升2.4%，收市升幅收窄至0.2%，總之佢好地地唔穿190，，手上仲有嘅短炒貨就持有先；INTC半注105嘅短炒貨，終於等到上返100美元，噚晚彈咗2.1%，唔知今晚仲有冇follow，按原定計劃，睇住條10日線，依家下移咗去105，再上唔返短炒可能搵位走人。MU撈返半注868，880至920呢個短線阻力睇下呢兩日衝唔衝得過，上得返920，或者又可以睇返1000附近條20日線，上返車就用返個880做防守，有乜唔對路要走佬。META暫時守住626，短炒落咗車未上返車住。今個星期唔少重磅科技股公布業績，明日係GOOG、IBM、TSLA、NOW同PM；星期四到INTC。GOOG仲有啲短炒貨諗緊博唔博業績，今晚再決定。不過摩根大通策略員Mislav Matejka預期，半導體股最近受壓情況唔會持續太耐，因為強勁盈利及估值改善將重新吸引投資者，佢提到喺2028年前，晶片供應唔會大增，目前股價亦接近超賣水平。另一邊廂，花旗美股策略主管Scott Chronert認為，「科企七雄」已經唔再適合作為評估人工智能(AI)交易指標，今年整體表現跑輸標指，尤其微軟及Meta股價因資本開支最多，引發市場憂慮，令股價下跌，反觀晶片股股價迅速攀升。另啲大行意見，令到阿Man個心十五十六。 美國與伊朗繼續互相攻擊，紐約期油急升3.52%後，倒跌最多2.69%，低見每桶80.27美元，收市仍漲0.9%，報83.23美元；留意油價又重返80美元之上，長期高企嘅油價，會拉動通脹回升，不得不防。不過Panmure Liberum策略主管Joachim Klement表示，投資者仍相信美伊兩國會返回談判桌，當美國唔再願意談判時，市場將預期油價會更長時間處於高位。雖然係咁，但美債息回升，反映市場仍對息口走向有憂慮。美國10年期債息曾升6.6個基點，至4.607厘；對息口較敏感嘅2年期債息上揚5.8個基點，至4.23厘。美滙指數一度上揚0.26%，至101.03；日圓回落0.12%，至162.6兌每美元。 昨日港股扭轉上周五跌勢，高開高走，恒生指數高開272點，盤中一度升593點，見25155高位，收市升580點，以25143接近全日高位收市，不過全日成交只有3064億元，未見價量齊升，而北水則錄得淨流出59.62億元，連續第二日錄得淨流出。雖然夜期時段，夜期一度跟隨美股早段做好再升至25248高位，觸及100日線，不過其後美股轉跌，夜期收市跌53點，ADR及今早黑期亦回復低水。不過恒指今早高開7點，報25150後，跌幅一度擴大至近百點，但好友仲頂得幾吓頭鎚，大市逐步收復失地並曾倒升最多110點，高見25253，受制100日線，淡友再反攻，大市再度轉跌，最多跌151點，低見24991。恒指半日收報25150點，升7點或0.03%。雖然港股昨日再升，但動力已明顯減弱，市寛背馳。事實上，恒指從上月低位反彈至今一度升逾2700點，逼近100日線，但成交方面則未見配合，有機會反彈已接近尾聲，至於會否再迎來一波新跌浪，則要視乎外圍市況及資金流向。短線恒指阻力仍於25200-25300，下一阻力為25600-25700即250日線所在；下方首個支持為25050約20周線，下一支持為50日線約24750，較大支持為10日線24350-24400，此線失守則有進一步確定反彈結束，如再失10日線考驗30日線約24050及20日線23800，為好友最重要一個防守區。