【盤房來料】 市場逐步消化加息影響 資金取態未見太保守(210926).docx

市場逐步消化加息影響 資金取態未見太保守 上周五美股個別發展，道指周五曾挫280點，收市仍跌95點或0.18%，報收51682；標指倒升12點或0.17%，報收7650；納指則倒升104點或0.39%，報收26522。Nvidia與亞馬遜揚1.3%及1%，SpaceX及Meta跌1.4%及2.4%。DELL上周五一度高見595，收市回落至568，都預咗600前呢啲心理關口會有回吐，仲有貨就睇住條5MA做防守，大約係560，阿Man仍然係買唔返呢隻貨，只有份食花生。MU，守到條10MA，仲要上埋條5周線982上面，終於忍唔住喺992追咗一注，收市見企到1000樓上，今早見夜盤上到1020樓上，用返980做防守，睇下上唔上到去上落區間頂部1050-1080。INTC等極都100邊上車，今晚再睇睇係咪要105-100搵位上車。MRVL持有，但NBIS喺220落咗車，又擺返個買盤去210諗住游下水，結果50MA、20MA同5MA全部守返，焗住219又補返貨，都係睇住210做防守，唔想贏變輸，蠢過豬嘅樣。AVAV暫時叫守到150，唯有等等。GOOG都係龜速咁，但周五喺355一嘢打返轉頭去接近低位收市，呢下肉酸咗，防守位大約320-340，要好好守住啲移動平均線。MSFT喺495買嘅一注，暫時無乜起色，防守用465，另一個買盤阿Man放咗個480，大約喺條10周線472上少少，博佢守到條10周線再上。Netflix遭券商唱淡，指串流平台最近缺乏大熱原創內容，股價插4.7%。市場逐漸消化加息影響，資金唔再risk off，比特幣急彈，庫藏公司Strategy急升16.4%，加密貨幣交易所Coinbase漲11.7%。美元或展開加息周期，但相信只要經濟同企業盈利趕得上，似乎市場都接受嚟緊仲要加息，投資者逐步消化加息嘅影響，願意將資金繼續投入股市甚至虛幣市場。NQ今早喺亞洲市場都幾威猛，上咗30000樓上仲企穩，今晚NQ個分水嶺喺30050，支持29950/29850/29750-29700，阻力30150/30250/30350-30400 路透消息，美國財長貝桑計劃於周末期間，喺紐約與中國副總理何立峰會晤，討論AI、貿易、稀土及經濟等議題。美國白宮周末期間公布中國訪美具體日程，3日訪問安排與5月美國總統特朗普訪華時相若。習近平與夫人彭麗媛將於華盛頓時間周三(23日)抵達，特朗普前往機場迎接，為最高規格接待。中美元首於周四會晤，當晚白宮國宴，將有中美一眾科技企業高層出席。美企方面計有亞馬遜創始人貝索斯、Alphabet(Google母公司)行政總裁皮查伊、OpenAI行政總裁奧爾特曼、蘋果執行董事長庫克、特斯拉行政總裁馬斯克、英偉達行政總裁黃仁勳、戴爾科技行政總裁戴爾等將出席白宮晚宴。至於中方企業包括比亞迪、寧德時代、國軒高科、小米、海信、萬向集團、中國銀行、中糧集團等中方商界代表將隨行訪美，出席白宮晚宴。預計中美元首會面為本周焦點；此外，本周將有多名聯儲局官員發表講話，或對未來息口路徑有更多提示。 上周五10年期債息再次觸及5厘，一度揚7.6基點至5.0064厘，2年期債息漲8.13基點至4.7454厘。美滙指數曾揚0.32%至100.564，其後輕微轉跌；歐元先跌後升0.17%；日本央行加息0.25厘，惟未有發出更鷹派訊號，日圓一度挫1.35%。「新債王」岡拉克警告，下次美國經濟衰退將觸發債務危機，令長債孳息急升，顛覆美債數十年來避險地位。屆時聯儲局及財政部或採非常規手段，如扭曲操作買長債，甚至重組債務。 上周港股表現反覆，雖然喺聯儲局議息公布後，恒指於上周四一度跌至24357低位，但周五卻反彈，曾升至24862高位，收市則報24750，險守5日線，按周恒指僅跌55點。雖然上周四港股以倒轉鎚頭形態回升，並已於周一成功回補24851-24889裂口，不過一直未能重越此裂口之上企穩，整個星期亦未曾重越此裂口收市，暫時10日線仍有阻力，而100日線及20日線即25100-25200水平阻力更大，而在此之前，更有另一下跌裂口25021至25161，除非本周能成功回補此下跌裂口，並企穩於25200水平，否則後市仍有機會繼續向下尋底。不過本周習特會或為市場帶來憧憬，或為疲弱嘅港股帶嚟一點支持。今日恒指高開2點，報24748，市場憧憬習特會或為港股沖喜，恒指升幅擴大至最多175點，高見24926，重返10日線，其後喺10日線(24888)附近上落。恒指半日收報24891，升140點或0.57%。搞嚟搞去，成交都係咁嘅樣，半成交額1084.86億元，唔算得配合到個升幅，不過北水淨流入30.83億元，連續多日錄得淨流入。暫時大市下方首個支持為24600，下一支持為24350-24400，跌破上周低位，則往100周線24180及24000尋找支持。至於上方首個阻力為24900，期指企穩上周密集區頂24950及25000心理關口，則現貨恒指有望向上挑戰下跌裂口25021-25161，不過25100-25200阻力唔細，要企穩100日線(25095)及20日線(25183)，方能扭轉目前弱勢。