市場憧憬阿爺送大禮賀回歸 22000水平先作整固
6月30日，大致多雲，有狂風驟雨及雷暴，未來兩三日天氣更惡劣。美股個別發展，但收市大致靠穩，道指升82點；標指跟納指分別跌2點及3點。聯儲局主席鮑威爾曾表示，7月議息會議將加息半厘或0.75厘，多名聯儲局官員亦表態指有必要進取加息抗通脹。三藩市聯儲銀行行長戴利稱，唔少人憂慮當局行動過於進取或導致經濟衰退，但佢更擔心通脹失控，對美國經濟先係最大風險，故當局有必要加息嚟減低需求，希望民眾很快感受到通脹壓力減輕。紐約聯儲銀行行長威廉斯則指，聯儲局有必要果斷抗擊通脹。
從幾位行長嘅講話反映緊同一個訊息，美國通脹問題一定要靠加息去解決，咁加息會唔會打壓經濟，甚至令經濟陷入衰退，答案係有咁嘅可能，但都無計架喇，都要局住收水，總之盡力以為，但好難寫包單美國經濟一定可以軟著陸囉。
美國一邊加息抑制通脹，但至少喺經濟層面上又唔係太差，大部份嘅企業盈利仍然保持增長，只係增速減弱；相對歐洲情況就唔係咁樂觀。自俄烏戰事爆發後，通脹急升速度相對美國更嚴重，歐洲PPI升至37%已嚴重摧毀歐洲製造業，之前歐洲仍可以透過負利率去刺激經濟，但喺通脹幾乎失控下，無奈亦要加息，但同時又話繼續QE，此等舉動實在係矛盾之至，反映歐洲面對目前局面亦束手無策，甚至已見陣腳大亂。
美國收水，全球資金萬劍歸宗加快回流至美元，美匯指數高企，歐元受壓，新興市場貨幣沽壓更大，人民幣兩個月之內貶值逾6%，過千億元資金從本港銀行體系流走，隨住美元繼續縮表收水，情況只會惡化。幸而人民幣並非完全對外開放，而本港亦有充足嘅美元儲備，美元再強都難動搖中港兩地嘅金融體系，只係資金唔會一如過往般持續流入，喺缺乏資金流入下，港股就只能上上落落，喺區間內移動，難以向上見大突破。
6月嚟到最後一個交易日，亦係半年結日子，港股喺呢一個月能重返22000水平，睇怕基金點都撐埋今日，做返靚啲半年結條數，而市場亦憧憬七一回歸阿爺將對香港送大禮贈興，呢個周末習大大訪港，即管睇睇有冇好消息帶畀大家。至於送完大禮之後，港股有乜反應，要等下星期返嚟先會有個明顯啲方向，古天后則傾向認為港股暫時都係區間上落，只係移動區間正一步步上移，亦引證咗之前古天后堅持3月中恒指低見18000水平，已成功搵咗今年個底部，但之後何去何從，重點都係要睇有冇資金流入，支持港股進一步做好。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。