【盤房來料】 港股反彈暫無法向上突破二萬七(220126).docx

港股反彈暫無法向上突破二萬七 美國總統特朗普於瑞士達沃斯世界經濟論壇上表明唔會用武力奪取格陵蘭，並尋求即時談判，言論令歐美緊張局勢暫時降溫，其後特朗普會晤北約秘書長Mark Rutte後表示，美國與北約達成格陵蘭協議框架，美方下月1日唔會按原定計劃、針對歐洲8個國家額外徵收關稅。美股周三晚大幅反彈，三大指數均錄得超過1%升幅。本來以為格陵蘭事件擾攘下，美股有機會執下平貨，誰知大部份喺watch list嘅股份無見到大特價，早兩日畀咗MAG 7嘅支持同阻力位，結果十居其九喺個支持位前面就彈。不過個VIX就落返17樓下之後，今早喺亞洲時段又上返18，暫時都未去返安全水平，主要係特朗普行事一向反覆無常，資金都唔會太進取大力掃貨，似係分注搵位上車。咁個NQ噚晚就夠晒刺激，盤中一度逼近25000，略為跌穿咗25100水平，但其後特朗普TACO，個NQ一企返穩25100就展開反彈，盤中曾彈到過上去26600水平，但噚日阿Man都講咗26650-26700會有較大阻力，暫時就真係畀呢個阻力位頂死咗。估計暫時NQ個移動區間由之前嘅25400-26000下移一級，去到25100至25700，暫時喺幾條平均線之間穿梭。要回復強勢，真係要打爆之前個移動區間頂部26000，先追得返YM同標普嘅步伐。今晚NQ好淡分界線喺26550，初步支持喺26400-26450，下一支持喺25250-25300，盤中最大支持係25100-25150。阻力方面首個阻力係25650-25700，下一阻力25850-25900，盤中最大阻力仍然係26000。 至於港股夜期及ADR噚晚亦隨美股回升，夜期重返26600水平，今早黑期更進一步逼近26700，恒生指數今早高開26750，剛好係噚日提及周一嘅下跌裂口頂部26741之上。以為回補裂口之後可以回復升勢，解除孤島形態威脅，誰知早段略為升至26779即調頭回落。其後A股亦由升轉跌，港股進一步回落，更重返上周二上升裂口底部26608之下，半日倒跌26點，報收26558。暫時咁樣幅日線圖就幾醜怪，要睇下半場能否扭轉跌勢回升，能否企穩26600係關鍵。由於本周暫時波幅只有416點，即使本周平均成交額減少咗，但416點周波幅又似乎真係少咗啲。若然今日可以收返喺26750，咁明日有機會再推高少少，上去26950-27000左右，做埋個周波幅至600點左右。不過要突破去年高位，似乎有未有咁嘅條件。相反，一旦今日下半場進一步回落至26500水平之下，逼近26450嘅話，就要小心明日或者向下破周二低位26363，回試條50日線及100日線，落去26100-26150，同樣可以將周波幅擴大至600點。 雖然特朗普近日一系列動作加劇國際地緣政治局勢更為緊張，令外圍股市出現震盪，但特朗普又再TACO，對各項事情取態反覆，剛剛就格陵蘭事件最新取態令美歐緊張局勢降溫，加上國家發改委推出刺激經濟、催谷內需政策方向，應該對大市帶來一定支撐。不過恒指一直未能企穩27000關，反映上方阻力暫難突破，目前恒指於日線保力加通道中軸至頂部徘徊，有機會喺26100至27100之間上落，又回復區間上落走勢。下周四期指結算，預料下周開始將步入轉倉高峰期，港股或於此區間內上落，完成轉倉後方再有新方向。個股方面，除咗平保可以作中線配置，用個65元做防守之外，今日留意隻洛陽鉬業(03993)，由於剛果鈷出口配額反映全球供應結構性收緊，推動價格顯著上升，對洛陽鉬業呢類大型生產商有利。技術走勢方面，用返個20-21元做防守，唔跌穿20元，現價整固一下，有機會再沿住條保力加道通再上去挑戰24。