內銀出手頂人仔 中港股市或略見反彈
1月23日，天氣嚴寒，密雲，間中有幾陣雨，高地可能結冰。美股周一強勢持續，道指最多升240點，升破38000大關，收市升勢略為放緩，跟標指齊創收市新高。道指收市升138點，報38001；標指升10點，報收4850；納指升49點，報15360。
本周科技美企開始公布業績，科技股繼續成為美股升市動力，蘋果股價升1.2%，市值重越3萬億美元大關。Nvidia衝破每股600美元，盤中高見603.31美元，最多升1.4%，收市放緩升勢至0.3%，報596.54美元，創歷史新高；費城半導體指數上漲0.25%，亦創新高，其他半導體股亦曾創新高做好，但高位開始見有獲利盤，令升勢放緩，TSM甚至倒跌收市。
彭博行業研究數據顯示，「科企七雄」第四季盈利增長料共達約46%，雖較第二季53%增速放慢，但仍拋離大部分主要標指分類股。花旗指出，儘管標指破頂，推動市盈率升至20倍以上，但唔少係由「科企七雄」引發嘅偏差，美股並唔係全部都睇落咁貴；若將標指成份股以同等加權計算，剔除七雄過度影響後，得出的市盈率約16倍，較標指標準估值仍有折讓。留意今晚收市後會有Tesla業績，預期收入增加7%，純利倒退36%，盈利再難有增長下，但PE卻高達60倍，如何支撐咁高PE成為Tesla最大難題，隔晚股價再跌1.6%，在毛利受壓情況下，唔好再期望反覆向上走勢，能夠喺190美元至250美元之間上落，捉住呢個波幅都算唔錯。
喺美股強勢破頂情況下，中港股市卻繼續反向下行，大摩認為係歐資主動型基金撤資，資金追遂美、日股，拋棄中港股。不過港股舊年跌足全年，外資都已走得七七八八，近日跌勢反而似係沽空刻意為之，港股喺現水平都未試反彈，主要係少咗外資入助力，資金唔肯入場，港股要出現V彈，睇怕要等空軍平淡倉離場。噚日成交為1121億元，近日跌勢較為顯著嘅日子，成交都增至千億之上，反映低位有人接吓貨，但資金面唔夠強，缺乏外資助力，無足夠買盤對抗，好容易一沽就散。
恒指噚日連萬五關亦失守，低見14794點，距前底14597點不足二百點，收市跌347點報14961點，今年短短15個交易日共瀉2086點或12.2%，9日RSI低至19，嚴重超賣，於ADR及夜期反彈百點，黑期亦重上15100水平，預期今早可以反彈高開。另外，據路透社報道，國有大行噚日出手助穩人民幣走勢，力阻人民幣兌美元跌破7.2元關口。人民幣在岸價(CNY)亞洲時段收報7.1968，係港股尾市反彈原因。
如果今日港股高後即掉頭彈唔起或再插，下試前低位14600水平，即市反彈阻力15250。不過恒指已跌至月線保力加通道底部14853，噚日跌至14800左右反彈，即管睇睇14800水平能否成為短期支持，月線保力加通道底唔再向下打開。恒指今日需企穩15250，一至兩日再重返15400水平，即重返5日線15360之上，並收復10日線15785方能脫險。港股幾時先有起色，睇怕要等美國正式減息，市場多咗熱錢，就要睇有幾多熱錢願意流入港股呢個低殘市場。
利益申報 : 筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。 免責聲明 : 本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。 版權聲明: 本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。