【盤房來料】 港股落後其他市場局面未改變(230426).docx

港股落後其他市場局面未改變 美股周三止跌回升，納指盤中再破頂，更與標指同創收市新高。道指周三高開122點後，升幅擴大至最多475點，高見49624，標指曾升1.06%至7138，以科技股為主嘅納指一度曾升1.65%，高見24660創新高。美市收市，道指升340點或0.69%，報49490；標指升38點或0.55%，報7102；納指升400點或1.65%，報24660。納指又創新高，只有將手上嘅股份再推高止賺價，ALAB噚晚曾經上到199.95，不過盤後回落至187美元水平，留意個180美元係咪有支持，暫時未想撈貨住，下一個較大支持係160-170美元。CRWV就到咗短炒嘅食糊位，103美元買嘅貨，短炒都有接近兩成回報，123沽咗一半貨，暫時用個110做防守睇住先。NBIS喺110美元持有嘅貨，160美元減咗半，餘下嘅貨用150美元止賺持有先。ONDS按短炒策略11.5美元食咗半，可以再等下有冇10至10.5美元做回補。RDW同樣按計劃12元左右又沽返半出去，有落返10.8至11元又可以撈返，勤力少少短炒，咁手上留半嘅貨，持貨成本就一路減低。NQ呢期都算易炒，基本上開市企到個分水嶺10分鐘就短炒做好倉，噚晚開市後無再穿個26750，企埋個26800就可以做好倉，又係逐個阻力位等佢破，結果三個即晚阻力全部到晒。26950-27000呢個短線阻力暫時未企穩，今晚NQ個分水嶺喺26900，支持26800/26700/26600；阻力27000/27100/27200，預咗個27000唔會咁易企定定，下面反而望實條5日線大約26850-26900，亦係今晚嘅分水嶺附近，穿返落去就回多少少，26700/26600睇下支持加度如何。 雖然特朗普表示無限期延長停火，但伊朗炮艇向霍爾木茲海峽水域附近船隻開火，刺激油價回升，紐約期油重返90美元水平之上，瑞銀商品分析員Giovanni Staunovo稱，霍爾木茲海峽石油輸出仍受到限制，令市場供應緊張，油價將獲支持。紐約期油暫時重返90美元之上徘徊，油價長期高企，對通脹會構成威脅，亦令息口無法回落，美元亦會走強；呢個情況下，亞太區嘅股市就無咁着數，今日亞太區股市受個油價影響，普遍回軟，港股亦唔例外。今早恒生指數低開64點於26098點後，跌幅一度擴大至322點，低見25840，半日跌292點或1.11%，報25870；國企指數跌87點或0.98%，報8714；科技指數跌114點或2.3%，報4849。大市成交1426億元，成交都係咁上下，但沽壓比起噚日大咗少少。雖然中東局勢未完全明朗化，但睇得出美伊雙方都唔多想繼續打落去，反而係雙方都想取得霍爾木茲海峽嘅控制權。目前市場情緒開始穩定，不過港股落後其他股市九條街呢個局面未見扭轉，暫時唔見得會有好大調整，短線25600-25800會有幾大支持，但上面個26800至27000阻力，無特別利好消息或催化劑下，暫時難以突破。