【盤房來料】 外圍升港股跌 外圍跌港股踩多兩腳(230626).docx

外圍升港股跌 外圍跌港股踩多兩腳 美股周一假期後個別發展，國際油價持續回落利好市場氣氛，市場關注記憶晶片巨擘美光(Micron)本周三盤後業績。道指輕微低開9點後，掉頭抽高最多323點，高見51887，最終升幅放緩；標指及納指則偏軟，美市收市，道指報51712，升148點或0.29%；標指跌27點或0.37%，報7472；納指跌351點或1.32%，報26166。 SpaceX股價連跌3個交易日，昨日急跌16.4%，市值單日蒸發4000億美元；公司上市後無幾耐就發債，仲講明係要嚟還債，變相債冚債，好彩止賺晒200美元後，見失守190美元無再手多多，收市跌穿埋160元，睇嚟去返個招股價130左右亦唔出奇。其他重磅股中，Alphabet旗下Google DeepMind高級研究科學家江珀(John Jumper)跳槽至Anthropic，股價挫5%，雖然GOOG有平貨喺底，但短炒貨大意無處理過，短炒貨成本都要382，噚晚一開市跌穿360，即遵守紀律358.5先止蝕，暫時睇有機會落埋條100MA，想撈貨都要睇定啲。券商Bernstein及Needham分別將美光目標價提高至1300美元及1550美元，刺激MU再升6.8%，至1211.38美元，盤後一度高見1245美元再破頂，公司喺周三收市後公布業績，計一計數1024撈嘅短炒貨，上到1200又有17%進帳，先減返半，貨底將會止賺價推高少少去1100。NBIS、MRVL嘅貨底，暫時防守位仲企得到，不過雖然手上嘅貨係平，但短炒歸短炒，都係要小心為上。 至於NQ噚日盤前表現反而幾好，上到30850左右，緊接開市進一步推升至接近31000水平，僅一步之遙就係過唔到，就拾級而下，結果納指收返喺30700樓下，今早亞太區股市搖搖欲墜，至中午日韓股市跌幅擴大至2%以上，NQ期貨亦插水，阿Man執筆時連個30200都穿埋。今晚分水嶺暫時係30150，支持30050/29250/28250，上邊阻力30250/30350/23450 摩根士丹利策略員Michael Wilson指出，股市目前面臨流動性不足威脅，大過潛在加息風險，有機會喺7月繼續對股市構成不利影響，提到聯儲局資產負債表支持作用正減退，但放貸增長正加速。不過，摩根大通策略員Mislav Matejka唱好股價低殘嘅消費股，指下半年表現可回勇。因消費股估值並不昂貴，全球多個地區消費指標處於接近紀錄低位，相信未來只會回升，尤其預期下半年地緣緊張局勢紓緩，油價及利率前景將改善。細摩睇好奢侈品、航空、酒店、旅遊消閒，以至零售股。 港股昨日斯人獨憔悴，當外圍股市，甚至內地股市做好之際，港股唔識升，外圍插水，港股踩多兩腳。恒指低開113點後，一度擴大跌幅至479點，跌至23444今年低位，其後跌幅收窄至156點，報收23768，連跌四個交易日，成交額則增至3486億元。雖然港股昨日繼續下跌，但收市跌幅大大收窄，收市重上23700水平，重返日線保力加通道底部，日線圖出現長下影線，喺極度超賣下，或有機會出現短線反彈。以為港股四個交易累跌逾千點後，超賣下有得彈下，誰知今早高開後，又繼續插水，恒指高開31點，報23800，其後升幅稍擴大至57點，高見23825後淡友隨即發難，大市掉頭倒跌。最多跌331點，低見23437。淡友得勢不饒人，就算超賣要反彈，噚日由23400彈到23900已經乏力再彈。 反彈之路卻平坦，上方阻力重重，首個彈阻力為5日線及10日線水平，約落於24300-24400，而5周線均24500阻力亦即目前下降軌底部阻力更大。除非重磅出現重大利好消息，否則要突破下降軌，進一步挑戰20日線約24900水平有一定難度。若然大市無法重返20日線企穩幾個交易日，則仍未擺腳一浪低於一浪向下尋底之形態。暫時已屆半年結之際，港股自今年1月創下28056高位後，一直以一浪低於一浪持續向下尋底，以近幾年平均波幅6000-8000點計算，如1月已見今年高位，而恒指已跌穿全部移動平均線包括俗稱牛熊分界線嘅250日線，目前處於25700，已超過兩星期，而一直未能收復，港股短線超賣喘定，亦不過係跌浪中反彈，其後將保持跌勢，直至滿足年波幅後，方能成功尋底。下方初步重要支持約為22900-23000水平，一旦失守，跌勢將加劇，或向下考驗250月線，約22500水平尋找支持。相反，大市若能反彈先企穩20 日線，方有條件逐步向上收復全部移動平均線，再展升浪，但暫時未見條件配合。