【盤房來料】 恒指23500-23800殺重牛後暫回穩(220626).docx

恒指23500-23800殺重牛後暫回穩 美伊臨時和平協議生效，緩解聯儲局今年稍後可能加息憂慮，道指周四最多升456點，收市升幅收窄至72點，收市報51564；標指升80點或1.09%，報收7500；納指升496點或1.91%，報收26517。美股上周四長周末前仍錄得升幅，其中費城半導體指數升6.42%，創歷史新高報14341；反映小型股表現嘅羅素2000指數升2.12%，報2979，亦突破歷史高位。美股嘅科技股表現保持強勁，不過SpaceX周四晚跌穿190支持位後進一步下跌，收市報185美元，講咗跌穿190美元就忍忍手，若然180美元不保，或者要落到165-168元先見支持。DELL就真係上返425-430啲游水食糊位，掛咗喺430又真沽到，今晚睇下個400支持位守唔守，已經掛定400接返半注貨，400接到，另一注擺咗喺385，用返380條20MA做防守。CRML終於上返雙位數，望佢醒醒定定，彈返上去條20MA同50MA大約係10.63至11.05，如果彈到呢個範圍，亦會考慮將9.78回補嘅貨減返半。ONDS險守9元，暫時手上短炒嘅貨係10.03回補嘅，現價計都坐緊艇，好彩係之前曾經喺13元食過糊，否則都好難再守住呢半注貨。至於NBIS周四一度逼近300，暫時睇住個275-280做止賺，反正手上嘅貨都已負成本，唔穿位繼續持有。MU同MRVL亦一樣，破頂唔估頂，前者用1080做防守，後者防守位275，繼續持有。KLAR表現唔錯，呢隻打算睇等20樓上。 美國與伊朗喺瑞士舉行嘅首輪會談已經結束。伊朗媒體報道，伊朗代表團已向美方提出抗議，不滿美國總統特朗普提出威脅，目前正在權衡應對方案。特朗普較早時喺社交平台貼文，警告伊朗必須立即阻止其喺黎巴嫩「高薪代理人」製造麻煩，否則，將再次重創伊朗。油價因此有小幅反彈，不過目前仍處於80美元水平之下，日韓股市今早低開後迅速反彈，但今早港股仍然係低開低走。因為侵侵成日口多多，不過今朝亞洲時段，NQ守到上日個分水嶺30300就反彈，至中午仍然級級上，阿Man執筆時上到30600，企得到今晚又有機會挑機個30800-30900。今晚NQ個分水嶺喺30500，支持30400/30300/30200阻力30600/30700/30800。 至於上周港股按周再跌794點或3.2%，並再創今年新低，雖然周二曾超賣反彈，並遺下一個小型上升裂口24771-24796，但當日升幅不僅削半至124點收市，更重要係10日線得而復失，反映恒指無力進一步反彈，隨後連跌三日，連續6周下跌。雖然波幅已達2296點，已滿足月波幅需求，但並不等於本月波幅不會再擴闊。一旦恒指本周跌穿23658，即由去年4月低位19260回升至今年1月高位28056高位升幅50%，不僅牛市將受到考驗，更有機會步入熊市，進入漫長調整。今早恒指低開113點，報23811，已經係半日高位所在，淡友隨即發動攻勢，跌幅最多擴至479點，低見23444，剛好將23450-23800全部重街貨牛證回收就喘定。其後跌幅逐步收窄，恒指中午收報23690，跌233點或0.98%。不過短線港股多項技術指標已呈超賣，港股本周有機會作短線反彈。反彈阻力仍然係關關難過，則反彈首個阻力為23900-23950，下一阻力24150-24250，上方24450-24550即5日線及10日線阻力更大。如大市反彈無法突破下降軌頂部，約為24600並企穩，則反彈過後，大市仍會以一浪低於一浪再度繼續向下尋底。事實上，外圍消息如息率、地緣政局等因素，與港股關係明顯不大，恒生指數走勢，主要受累重磅科技股，而資金明顯自此類股份流出，短線而言，投資者暫宜避開此類股份，未宜進取撈底。整體上，港股確實存在多重壓力，包括聯儲局釋放鷹派信號，市場對加息預期升溫；內地限跨境投資困擾氣氛；以及港股7月將迎來解禁潮，預計2550億港元股份禁售期屆滿，或引發市場對於潛在股票拋售擔憂。