恒指5日線失而復得再挑戰10日線
美股周一個別發展，就快又到業績期，市場憧憬新一季業績繼續表現強勁，道指高開110點後，升幅曾擴大至273點，見51928；但油價回升，加上晶片股及大型科技股受壓，局限道指升勢，並拖累納指一度跌0.54%，標指亦曾回吐0.19%。道指收市仍升195點或0.38，報51850；標指跌幅收窄至4點或0.06%，報7807；納指跌120點或0.44%，報27245。中東局勢持續緊張，市場質疑美國總統特朗普宣稱俄烏「能源停火」是否有效，紐約期油一度跌2.44%，收市倒升2.06%，報每桶93.74美元，布蘭特期油亦由跌2.28%，轉升1.84%，收報106.65美元。高盛將12月布蘭特油價預測上調5美元，至每桶90美元，並指油價高企主因中東供應風險、庫存低及補充實物庫存需求等，但中東供應持續調整最終會推低油價，明年布蘭特油價平均預測維持80美元。美滙指數一度升0.38%，報102.6，日圓跌0.3%，低見158.76兌每美元；歐元跌0.44%，至1.1153美元，創近1年半低位，投資者擔心法國財政狀況，歐元已連續第5周向下。加密貨幣「一哥」比特幣最多跌2.4%，至82217美元。現貨金價先升後回，曾跌0.94%，低見4154.78美元。周一為美國哥倫比亞日，美債市場休息。
個別股份中，星巴克否認洽購墨西哥風味連鎖餐廳Chipotle，Chipotle股價挫3.8%，星巴克則升1.7%。據報正洽談收購人工智能(AI)初創公司Decart嘅亞馬遜，股價跌1.1%。記憶晶片股受壓，Sandisk急瀉6%，阿Man仲持有嘅MU，中咗985個買盤，但無奈一開已穿980，今早夜盤見970都穿埋，962走人先，雖然唔少人認為美股係唔使止蝕，但阿Man短炒都有短炒嘅原則，穿咗位走先，948係最後防線，穿埋可以落返去880-920。INTC跌3.2%，不過90條防線未受威脅，呢隻阿Man有貨喺115短炒倉未走，但因為本身有平貨底，個止位就鬆手咗，其實穿咗110走先都無壞，暫時要留意住100都企唔穩就有啲濕滯。Meta反彈3.4%，阿Man短炒貨均價725仍然持有，暫時睇住條20MA大約720做防守。公司行政總裁朱克伯格稱，集團將進一步增加支出，已經為下一步做好準備，Meta已經喺前沿AI模型方面追趕競爭對手。MRVL手多多撈返278嘅貨，270畀個止盤KO咗，仲有218嘅貨喺手，今晚企返260條20MA就放心少少。NBIS上周去咗旅行，另一半錯過咗食糊250食糊，搞搞下又打回原形，仲要穿埋220，215手起刀落，走埋啲貨尾單位，保住啲短炒盈利為先決條件。DELL、MSFT、GOOG繼續持有先，CRWV穿咗80，暫時86嘅短炒貨已着晒燈，去到止蝕區附近，不過78-82係一個平台區，今晚睇下上唔上得返80。如果有留意新聞，大家應該見到侵侵喺8月份買入MCD，估計佢8月份買嘅貨都要250樓上，膽粗粗喺233跟佢買些少，話晒都有3厘年息，呢啲價又接近52周低位，有一定安全邊際。NFLX做咗個小圓底，70平均價上咗車，52周低65做防守，中線上返90都唔算過份樂觀。至於個NQ又玩返低一級，今晩分水嶺30750，剛好係條20MA，暫時夜盤喺30650徘徊，若然穿埋30650，下方支持係30550/30450/30350-30300，至於阻力係30750/30850/30950-31000。
港股昨日高開低走，雖然恒指高開223點，開市後一度升至24455高位，但20日線明顯遇阻，最終升幅收窄至只有59點，報24271，成交額只有1626億元，買賣兩閒，交投淡靜。今日恒指低開99點，報24172點，跌幅略為收窄高見24219，又受制10日線，淡友再度發功，大市跌勢擴大至最多283點，低見23987後喘穩，其後反彈重返24000，5日線失而復得，家下喺條10日線附近爭持。恒指半日收報24176，跌95點或0.39%。大市半日成交1017.81億元，北水淨流入6.12億元。雖然北水已假後回歸，但成交未有起色，北水買貨亦唔算積極。而恒指自8月開始，持續沿下降通道運行，更一直受制20日線，大市欠缺向上突破催化劑，就連個別熱炒板塊亦熱度冷卻，交投淡靜。不過有消息指阿爺隨時出手救A股，咁淡友亦唔敢太過放肆，今日守到24000，若然收市企返上去10日線，企穩24200，有望再一次挑戰20日線，但20日線能否企穩，係後市好淡關鍵。
Administrator
2026年10月13日