【盤房來料】 期指步入轉倉高峰期或有助超賣後反彈(240626).docx

期指步入轉倉高峰期或有助超賣後反彈 美國聯儲局貨幣政策立場轉鷹，投資者對估值高企，以及開支龐大嘅人工智能(AI)相關股份嘅憂慮加劇，美股周二捱沽，以重磅科為主嘅納指100指數收市重挫3.3%。美市收市，道指報51666，回吐45點或0.09%；標指跌107點或1.44%，報7365；納指跌579點或2.21%，報25587。 SpaceX早段一度再跌4.8%，其後反彈倒升7.1%，不過彈到164就返轉頭，收市升幅收窄至1%，似乎165-168有阻力，至於下方都係睇住個130-140支持。GOOG真係如預期跌到去50MA附近，大約338反彈，暫時要扭轉弱勢，先要企返條10MA同20MA即係360-365先再講，暫時除咗免本貨底仲喺手，短炒已經清咗倉，睇埋今晚咩環境再作打算。至於MU噚日急跌逾一成，無等到1100止賺，盤蒯已先行喺1124落車，因為呢一注喺1024撈，有一嚿水都落返先，不過盤中擺咗個1050買盤中返半注，1000買盤就未有，今晚盤後公司公布業績，諗諗下除消咗1000個買盤，反而用個1030止蝕，因為10MA喺1035，穿咗有乜唔對路走先，等業績出咗再算，不過20MA喺1003，穿咗就要睇920條30MA守唔守。DELL喺430減咗倉，410嘅貨仲喺手，一直用個380做防守，395條20MA加返少少，博佢企穩420，有冇再升穿435挑戰前頂。NBIS同MRVL仲有短炒貨喺手未走，相對其他熱炒科技，呢兩隻都算強。 不過噚晚MU同SNDK跌逾一成，拖累納指急跌，NQ未開市已穿咗個30150分水嶺，雖然開市反彈過，但連3000都上唔返就級級落，最低落到29500前先止跌反彈，暫時亞洲時段彈到29800附近。今晚分水嶺29750，支持29650/29550/29450，阻力29850/29950/30050，企返20MA約30025，企好30050先有條件終止個調整。企得到30050，上面可以進一步睇30150-30200。 美國10年期債息一度回落4.4個基點，至4.459厘，對息口較敏感嘅2年期債息降4.66個基點，至4.1792厘。美國6月份製造業採購經理指數(PMI)初值從5月的55.1升至55.7，優於預期的54.6，期內服務業PMI初值由5月的50.7漲至51.3，高過預期51.1，綜合PMI升至52.2。指數公布後更令市場憂慮聯儲局立場轉鷹，美滙指數最多上揚0.41%至101.43。 港股錄得五連跌，恒指昨日高開31點後反覆偏軟，一度跌516點，低見23252再創一年低位，全日跌432點或1.81%，報收23336，成交額3343億元。不過至夜期時段，雖然美股三大指數下跌，但夜期跟ADR見反彈，今早黑期反彈重上23500水平，恒指高開84點，報23420，早段升幅擴大至最多185點，高見23521，但淡友並未罷休，升幅逐步蒸發，半日最多倒跌87點，低見23248，啱啱好又再回收23250重街貨嘅肥牛。其後午市收市前逐步收復失地，恒指中午收報23344，升8點或0.04%，北水連續第二日錄得淨流入。 事實上，多項技術指標均顯示港股目前已呈超賣，14日RSI已跌穿30步入超賣區，2日RSI更跌低於2，短線可迎來技術反彈，惟資金面壓力未取，反彈上方仍面對重重阻力。反彈首個阻力為昨日成交密集區頂部23800，下一阻力為24000，而10日線約24150為近幾次反彈均遇阻再回落，港股如無法企穩10日線及突破目前下降軌頂部約24600，亦為20日線約24675，短線反彈後，港股仍會繼續向下尋底。而港股自今年1月創下28056高位後，一直跟外圍其他股市背道而馳，當美、日、韓、台股均在AI熱潮下屢創新高，港股卻被指數權重股拖累，表現每況愈下，而當外圍股市調整之際，港股卻隨之向下，令港股形成一浪低於一浪形態，資金僅集中炒作AI相關半新股，然而呢一批炒得火熱嘅半新股，於7月將迎來合共2550億解禁潮，如相關股份急挫，難免進一步影響市場氣氛。