【盤房來料】 恒指再失二萬五惟暫未見大跌風險(240726).docx

恒指再失二萬五惟暫未見大跌風險 中東局勢急劇惡化，油價繼續向上，加上Alphabet及Tesla資本開支急升引發憂慮，美股周四顯著受壓，道指一度急滑超過600點，俗稱「恐慌指數」的VIX波動指數曾抽高22%，至20.31。道指收市跌506點或0.97%，報51711；標指跌90點或1.21%，報7408；納指顯著下跌553點或2.15%，報25137。 重磅股唔少都插水，TSLA股價收市急瀉14.5%，GOOGL跌7.1%，為表現最差道指成份股，兩隻巨無霸市值分別蒸發約2000億及3000億美元，阿Man短炒貨用340去止蝕係好合理，短線330至340呢個平台，應該會由支持變阻力。Meta及亞馬遜股價跌幅分別為3.4%及4.6%，META早幾日喺648落晒車，轉眼間又去返600美元附近之前啲上車位580-600，噚晚見股價倒水咁倒，即管擺個585同600分兩注試下再上返車，暫時中咗600個盤，用返個580做防守，若然連條5月線大約596真跌穿，580都會投降先。「科技七雄」指數跌4.8%，市值合共蒸發7970億美元，不過MSFT又死唔去，咬住個380，其實估值嚟講，呢啲價嘅微軟唔算貴，只係佢股價一直微軟，暫時無乜誘因炒上去。INTC仲有半注105嘅短炒貨喺手，又死唔斷氣，始終都咬住100邊，，暫時出完業績股價盤後無乜事，總之89條100日線千祈咪失守。DELL同MU算係咁，990減咗半MU，睇下950守唔守，接近50MA或者又撈返走咗嗰半注。DELL繼續keep住一半短炒貨，NBIS暫時喺條20MA附近整固，繼續Keep住先。今晚NQ分水嶺28600，支持28500/28400/28300/28200，上方阻力28700/28800/28900/29000。 油價急升加劇通脹擔憂，美國10年期債息一度攀高5.8個基點，至4.715厘，對息口較敏感嘅2年期債息漲6.4個基點，至4.366厘的2025年初以來高位；德國10年期債息升3個基點，至3.21厘的2011年以來新高。美滙指數一度揚升0.41%，至101.54，日圓跌0.52%，至164兌每美元，再創40年以來新低，日圓名義有效滙率指數更瀉至紀錄低位，反映圓滙對歐羅、英鎊及多隻亞洲貨幣表現全面疲弱。啲Yen無乜起色，唔少人問阿Man幾時換Yen去旅行好，阿Man一直認為幾時換Yen去旅行都無所謂，乜嘢時候去日本最好，有閒錢嗰陣時去咪最好囉。 港股昨日反彈，恒指重上二萬五水平，收市報25210，全日升318點或1.28%，但阿Man噚日都講咗，條100日線即係25200水平企唔企穩仍有待觀察，話口未完，夜期就跟美股倒水跌逾300點。其實望下噚日嘅成交額，進一步縮水至2334億元，其中北水錄得淨流出42.26億元，終止前兩日連續流入。雖然北水並非決定港股升跌嘅主要因素，但缺少北水助力，港股要更上一層樓變得困難。而近日港股於二萬五水平之上，升市日子成交一直未能配合，走勢上已見背馳。今早黑期於24900水平徘徊，恒指低開278點，淡友想發力，喺科網股及金屬股拖累下，恒指最多跌369點，低見24841，不過接近條10日線，即係24800水平好友力守，隨後上半場喺24900水平附近上落，恒指半日收報24891點，跌318點或1.27%。不過睇返升跌比都幾差，而國指跌94點或1.13%，報8258；科指跌79點或1.69%，報4619；今日上唔返25000，24800呢度防線唔知好友仲守唔守得住。大市半日成交1171.22億元，北水淨流入5.31億元，雖然北水錄得淨流入，但數額唔算多，之前都講咗25000水平再買上去值博率唔高，再加上周末前夕，資金唔積極入市都正常。 留意大型科技股近日已乏力上行，由於市場預期重磅科技股業績難有驚喜，港股於25000水平再上行空間有限，不過暫時未見有大跌風險，短線恒指或先回測50日線及10日線約24650-24750水平尋找支支持，呢個位守到，後市又唔係太差。除非失守個24600，下面就要睇10周線即及20月線約24400水平，至於較強支持為20日線約24000水平，此關不容有失，否則港股料再往下尋底。至於上方25200要企穩真係要有成交配合，再上啲條250日線即25600-25700水平阻力更大。