【盤房來料】 港股再失全部平均線頽勢未扭轉(240926).docx

港股再失全部平均線頽勢未扭轉 伊朗總統於聯合國會議上，態度表現強硬，指伊朗受制裁時，霍爾木茲海峽無法自由使用，佢嘅態度刺激美國債息及國際油價回升，美股周三回軟。三大指數下跌，道指跌超過300點，收市跌352點或0.68%，報51511；標指跌58點或0.75%，報7706；納指跌308點或1.13%，報26936。本月聯儲局上調利率0.25厘後，債息曾短暫回落，但噚晚嘅製造業PMI創下2021年7月以嚟高位，遠高於市場預期，令市場愈發相信，下月議息再加息機會大增，目前市場已相信有逾半機會喺10月再加息一次。由於Fed嘅通脹目標2%遲遲未能達標，更未有跡象顯示短期內可以接近目標，債息噚晚又回升，拖累美股走軟。 重磅股中，亞馬遜及Alphabet股價分別挫3.8%及2.2%，阿Man喺328上車短炒嘅GOOG企唔穩350插水兩日，今早叫定返啲，暫時喺336附近，但又穿返晒幾條平均線，認真無癮，唯有望佢守好條250MA，323呢個位穿不得。至於MU狗衝返1042嘅貨，擺定喺1100又好彩落到車，又順手擺返個1048睇下接唔接得返，防守位1030，博佢暫時個區間底略為上移至1040，至於上面保守少少，先睇返個1100-1150，買唔到1048就算數，唔想博命高追。DELL喺550補返一注，另一注打算喺20MA附近520補埋佢，暫時未中，中晒兩注用個500做防守，大約係目前30MA位置。INTC喺115補嘅貨持有，120企穩再等。MSFT仍然呆滯，短線無乜特別利好催化劑，但守到480就keep住先。META放咗兩個買盤，735及715，先中一注735，715等緊，680-700作為防守。MRVL有侵侵加持，喺市場回吐之際，暫時表現算硬淨；至於NBIS穿咗230，但見幾條線集中喺220-230，219買嘅貨忍一忍，暫時未落車。AVAV暫守住150，但要回復強勢，呢兩日最好上返160企，否則本來個小圓底收集形態受破壞。噚日阿Man講過，NQ個短線嘅SI 2扯到上98，隨時出現回調，噚晚一開市穿31000個分水嶺，嗱嗱聲沽佢落去，去到30700預計嘅最後一個支持食糊，都執到近300點利潤，誰知佢再穿埋個30700。今晚分水嶺30700，支持30600/30500/30400，上方阻力30800/30900/31000。 美股腳軟，港股都無運行，阿Man從來唔信乜嘢東升西降，當美股要西降，港股喺東邊都要陪葬，噚晚夜期就係畀個美股拖咗落去穿日市低位。港股連升三個交易日後，本來噚日已回吐，先失25000關叫險守個24800支持。今早恒指裂口低開184點，但貼近半日低位24648見反彈，一度上返24791，但未能完全回補整個下跌裂口，目前再度失守全部移動平均線，半日跌129點，報收24704。半日成交縮水至僅得821.82億元，除咗北水繼續淨流入27.21億元，其他缸邊友乎無心戀戰。 昨日港股重返二萬五之下，主要係有報道指今次國家主席習近平出訪美國，並未有內地巨企舵手隨團訪美，之前投資者憧憬習特會或對中美貿易帶嚟好消息，但如今並未見任何內地巨企隨行，幻想破滅，昨日相關股份股價走軟，今早相關股份表現繼續呆滯。其實中美矛盾又豈能靠一次元首會面可以徹底解決問題，只係上周恒指跌至日線保力加通道底部，剛才好作出技術反彈後抽，市場以此為炒作藉口。事實上，港股一直未有走出區間上落市悶局，而由1月高位延伸至今嘅下降軌，遲遲未見突破向上，大市已連續三個季度，以一浪低於一浪形態向下發展。雖然恒指一度從6月低位22518反彈至26187，但26000未能企穩，又再反覆回落，並再度失守25000，如20日線成為本輪反彈阻力，恒指再困於保力加通道中軸下方，並跌破底部即24473，料跌勢將加劇，再往24000尋找支持。至於反彈仍然阻力重重，最低限度大市要企穩100日線即25062及20日線25087，方有條件扭轉弱勢。