24年開局首月能否反彈要守16600
1月2日，大致多雲，早上局部地區能見度較低，日間部份時間有陽光。美股喺2023年最後一個交易日先升後跌，道指自歷史高位37710點回吐逾百點，收市微跌20點，標指跌0.28%，納指挫0.56%。2023年全年道指升13.7%，標指上漲24.2%，距歷史高位僅一步之差；納指全年勁升43.4%。美股年結一如預期，保持高位收市，美股基金經理過肥年，花紅袋袋平安。留意12月初美股資金開始轉炒三四線股，重磅股停滯不前，上週已開始出現轉弱，3大指數更出現多次尾市回吐試支持位，走勢上反映美股資金面正在轉弱。
本週三美國有小非農數據，週五有非農數字，尤其係工資增長，都會影響美聯儲減息預期。美股目前估值唔平，今年要睇住兩大因素，一個係經濟放緩多少，能否軟著陸，另一個因素係減息力度有幾大在兩者互相影響，企業盈利表現亦相當重要，目前美股已從低位反彈上歷史高位，大藍籌預估市盈率已超過30倍，喺經濟並唔係全面向好之下，現水平買入美股嘅值搏率一般。不過美股已成為全球資金避難所，估計呢個大趨向在未來一年會有重大改變。
美國國會預算辦公室下調最新經濟預測，由去年初估計增長2.5%，降至只有1.5%增長。2025年喺減息效應下，才有望回復2.2%。辦公室又認為失業率會回復上升，年尾將升至4.4%，失業減少支出開支係拖慢經濟嘅主要原因，另外企業投資意欲仍處較低水平。今年更值得關注美國待業職位增幅，若跌穿750萬，或會引起美聯儲關注，屆時可能會提早減息。
至於歐洲問題更大，滯脹問題相當嚴重，德國連續3季出現負增長，早已陷入衰退。喺過去一年裡，喺美國加息大環境下，再加上高通脹，歐元區焗跟美國加息。但高息狠狠打擊本身已十分脆弱嘅歐洲企業，為保住企業唔出現倒閉潮，歐央行唯有一面加息，但另一方面繼續1.7萬億歐元疫情緊急資產收購計劃(PEPP)，歐央行最新講法係2024年底前都唔會縮表。所以歐央行目前係表面上收水，實質上仍然放水。
另一個要注意嘅係日圓走勢，直接影響全球資金供應正正係日圓Carry trade，喺美國加息期間，日圓已成為對沖基金最大資金供應方，但日央行已明言4月會終止貨幣寛鬆政策，若對沖基金借貸成本上升，可能會引發新一輪拋售資產減債。比較理想係日圓進入加息週期同時，美息開始下降，咁資金面有機會安全過渡。
中港股市仍然脆弱，除咗係外資早已撤離，其實內部問題更大，本身陸資由於資本短缺，不停沽貨，即使內地股民一再推說係彍資沽貨，但事實上陸資本身都係彈出彈入，未有資金肯坐定定。總結2023年恒指連續四年下跌，全年跌2734或13.8%，由最低位15972點反彈1075點或6.7%至17047年結。恒指10日線(16662)已升破20線(16570)，發出短線黃金交义向好訊號，而兩條平均線大約喺16600點水平，係短期重要支持，另一個支持位係5日線附近，大約16800水平，企穩後如能向上升越50日(17107)線後，下一個較大阻力為下降軌約17300關以及100日線(17616)，即管睇下24年第一個月能否持續反彈。
利益申報 : 筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。 免責聲明 : 本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。 版權聲明: 本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。