【盤房來料】 港股短線反彈 24200反彈阻力大(161126).docx

港股短線反彈 24200反彈阻力大 美國最新物價數據有助紓緩對聯儲局進取加息擔憂,美股周五個別發展,道指高開193點之後,最多上升224點,高見52521,收市升50點或0.1%,報52347;標指跌30點或0.4%,收市報7561;納指再跌229點或0.91%,報25136本周累計,美股三大指數反彈介乎2%至2.5%。標指曾跌1.22%,納指一度挫1.95%,以重磅科企為主嘅納斯特100指數最多滑落2.4%。 Nvidia周五股價先彈後跌,最多挫4.7%,收市回落2%,一周累計急跌12.8%,為連續第六周下跌,創去年4月以來最長連跌周數,一周市值蒸發超過5730億美元。由於上周四阿Man去咗外遊,NVDA喺上周四晚股價急跌亦無處理到手上嘅短炒貨,無加又無減,目前仍然係均價169坐住啲短炒貨。暫時黃仁勳已請辭,但有人發起聯署要求佢留低,目前已有超過13萬個簽署,當中包括6500名Nvidia員工;據聞唔少矽谷大科企嘅巨頭,亦支持黃仁勳留低。據Vanda Research統計顯示,Nvidia周四裂口低開14%後,博反彈嘅散戶投資者喺開市首30分鐘淨掃入價值1.11億美元NVDA股份,為歷來最多,並較正常高出40倍。同時,新加坡富豪投資者廖凱原(Leo KoGuan)表態支持已請辭嘅黃仁勳,直言若Nvidia改由其他人掌舵,佢唔會再加碼投資,透露自己現時對NVDA投資金額約為13億美元。至於其他AI相關股份表現麻麻,NVDA似乎力守160,目前喺呢個水平附近靠穩。周五晚超微半導體(AMD)股價又插水8.8%,Sandisk插水5.7%,SK海力士ADR回吐4.3%。微軟旗下Outlook以及Copilot系統故障,全球多地用戶受到影響,股價跌1.8%後回穩;思科系統訂單數字遜色,股價挫6.2%,為跌幅最大道指成份股;蘋果盤中破頂高見360.83美元,收市創新高報356.27美元,上升0.4%。可口可樂反彈1.9%,為表現最強道指成份股。而阿Man個短炒倉係完全無郁過,META,GOOG同AMZN嘅短炒貨繼續持有,至於SPCX已決定收集作長線投資,嚟緊係回調時儲貨,至於MU繼續炒上落,680-840呢個範圍。 據美國銀行引述EPFR Global資料顯示,截至11月11日為止一周,全球股票基金吸資983億美元,流入美股資金達636億美元,為6月以來最多,期內黃金基金錄得4900萬美元資金流入,加密貨幣基金則出現19億美元贖回。美國公布10月份生產物價指數(PPI)按年增長加快至6.5%,創2022年以來最快增速,但略低過預期6.6%升幅,按月增幅由9月1.4%放慢至0.3%,低過原先估計增長0.4%,期內核心PPI按年升0.5%,符預期,按月漲0.3%,與估算一致。美國10年期債息曾升7.4個基點,報5.176厘,但對息口較敏感嘅2年期債息最多回落5.65個基點,至4.8249厘。高盛預期美國10年期債息於明年底降至4.6厘,低於市場平均估值,反映美債對沖吸引力增加及美國通脹緩和。紐約聯儲銀行總裁John Williams周四出席活動時表示,通脹依然太高,聯儲局官員應採取進一步行動,以遏抑物價壓力。 美滙一度上揚0.26%,報103.44,歐元下降0.31%至1.1021美元,日圓曾跌0.22%,報160.19兌每美元。加密貨幣「一哥」比特幣8月以來首次失守7萬美元,曾插5.38%至最低67628美元,據Coinglass數據顯示,喺24小時內有約15億美元加密貨幣好倉遭強制出售。美國司法部周四稱,當局已查獲約12億美元虛擬資產,呢批資產先前從加密貨幣交易所幣安(Binance)被盜。美國司法部同時承諾採取行動,打擊源自北韓網絡詐騙活動。之前阿Man都講過,BTC最風光嘅時候已過咗,家陣成個國會畀民主黨控制住,而一向係共和黨較支持發展虛擬貨幣,而往後民主黨會唔會出一啲政策去窒礙虛幣發展不得而知,BTC可能又回復返喺60000-80000之間上落。 至於港股上星期表現麻麻地,月初係威係勢,但上周雖未至將前一星期升幅完全抹去,但恒指一周累計跌844點或3.44%,以周線圖嚟睇,都幾樣衰。港股本來於月初略有改善嘅情況又一次打回原形,上周三至周五三日,連續出現下跌裂口,分別為24430-24471,24132-24268,及周五23930-23942,周三及周五裂口均於即日回日回補大部份,目前周四裂口較為顯著,而該裂口將成為短線較顯著阻力位。大市已先後跌穿多條移動平均線,技術走勢全面轉差,令到投資者憧憬港股結束今年而來一頂低於一頂跌浪嘅希望再度破滅。 上周五大市裂口低開,由於出現第三個消耗性裂口,該裂口即日補回大部份,但卻未能守於裂口頂上,當日一度跌至接近23500低位,亦為10月22日下跌裂口23513-23620底部附近,至尾市及夜期反彈。雖然夜期及今早黑期已重返23800水平,成功重返20日線,但如不能企穩11月5日之大型上升裂口底部即23920,則反彈過後,跌勢將持續,並再度考驗20日線即23700水平,如無法企穩20日線,下一支持為23500,此關失守則11月餘下時間或再出現更低位。相反,如大市能重越23900,並重返24300水平,企穩50日線,則有條件於本月餘下時間再挑戰高位,並再向上擴大月波幅,而上方阻力為24500/24600,24800/24900及25000-25200。只係暫時唔見大市有條件向上,成交不足呢個問題一日未解決,港股於本季之內唔再穿前底即22800水平已經要劏雞還神。
【盤房來料】 港股短線反彈 24200反彈阻力大(161126).docx
Administrator 2026年11月16日
分享這個貼文
標籤
封存
【心水股貼士】COHR於光通訊領域已築護城河(131126).docx