【盤房來料】 港股成交仍薄弱 上方24500阻力仍大(061026).docx

港股成交仍薄弱 上方24500阻力仍大 重磅科技股造好，但法國財政憂加劇，市場仍有戒心，美股道指周一高開22點後，最多倒跌314點，低見50862，其後低位回升，曾倒升227點，至51404，收市道指僅升90點或0.18%，報51267；標指升51點或0.66%，報7773；納指升286點或1.05%，報收27477。美股科技七雄指數漲1.07%，報238.22點創收市新高，盤中亦破頂見239.38點；標指最多上揚0.593%，以科技股為主的納指破頂一度躍高1.3%，高見27544點，收市亦創新高。重磅股中，大摩唱好SPCX，股價抽高7.6%，TSLA水漲船高，亦升逾2%，阿Man完全錯過咗SPCX，之前有講過長線投資可以喺140至150收集，但講完已無咗件事，錯過低位收集。至於TSLA本身有貨，股價回升當然係好事。MSFT及NVDA分別升1.5%及2.1%，兩股都喺阿Man個倉裡面，MSFT等股價重上550高位，至於長期持有嘅NVDA創收市新高，其實現價NVDA完全唔貴，股價上到250仍然合理。META回升1.9%，繼續睇住720做防守，等股價企返上750。SpaceX行政總裁Elon Musk證實，台積電(TSMC)可能參與得克薩斯州Terafab晶片製造項目；受消息影響，台積電美國預託證券(ADR)彈升2.8%，報485.8美元創收市歷市新高，盤中破頂高見487.47美元；台積電喺台灣收市則漲3%，TSM亦係阿Man美股倉嘅長期持貨股之一，雖然數量唔多，但早已免本，睇下股價有冇本事上埋500美元。雖然INTC早於今年4月已加入Terafab項目，但多隻香爐多隻鬼，TSM嘅加入消息，令INTC股價噚晚跌咗2.6%。呢期阿Man都難炒美股，主要係美股嘅標指同納指雖然節節上升，但市寛就反向縮水，市寛背馳令阿Man唔敢多手，短炒倉部份獲利後就無太積極買貨，MU喺1100減咗半，又擺返個1030近20MA睇接唔接得返，MU似乎應該炒住上落先。MRVL、DELL同CRWV繼續持有，GOOG短炒嘅貨等緊向上突破。NQ噚晚一企穩個分水嶺，開市追渣31078，可惜無等破頂，喺31218落咗車，結果企埋31300，梗係唔估頂。今晚分水嶺上移至31300，上面31400成為另一個高位，企得到又新高，企唔到雙頂回嘅話，下面支持31200/31100/31000。 美國10年期債息曾漲7.1個基點，至5.351厘，對息口較敏感嘅2年期債息升2.9個基點，至4.854厘。雖然債息仍高企，但美股一於少理，仍然做好。美滙指數最多揚升0.6%至102.54，歐羅創17個月新低，曾挫0.84%至1.1161美元，日圓跌0.29%至158.3兌每美元。摩根士丹利策略員Michael Wilson認為，美股估值喺夏季初急速向下後，部分市場領域變得吸引，尤其睇好一些工業股如卡特彼勒(Caterpillar)及通用電力(General Dynamics)，認為基本因素前景依然強健。高盛則預期，美企第三季業績會由人工智能(AI)基建開支推動，AI變現及生產力將成為重要主題。該行策略員Ben Snider估算美企盈利將再次優於預期，惟增速較次季放慢，因成本壓力限制邊際利潤擴張，有利美元走勢則輕微推高收入。 港股昨日先跌後回升，恒生指數雖然早段一度跌136點至23835低位，但其後喘定，大部份時間於23900水平爭持，至尾段回升，重返24000水平，並以全日高位24040收市，倒升68點，不過北水缺席下，成交額僅得981億元。昨日大市跌至23800水平附近喘定，此水平剛好為由1月延伸至今下降通道底部，而23900則與6月低位反彈至8月高位回吐黃金比23918附近，此兩位置守穩，加上短線超賣下，港股反彈亦屬合理。夜期及ADR進一步反彈，較昨日收市高水逾百點，今早黑期亦於24200水平之上徘徊，恒指今早順勢高開239點，報24279，升幅一度擴大至最多313點，高見24354，完全回補上周五下跌裂口，不過未能企穩喺裂口頂之上，加上香港9月PMI數據公布後，大市回吐，升幅曾收窄至158點，低見24198，但半日仍守於24200水平之上，午後即管睇下上唔上返5MA大約24275企穩，企得到就有機會繼續反彈，上方目標先睇24500，大約係10MA。恒指半日收報24228，升188點或0.78%，今日缺北水下，大市半日成交540.48億元，都預咗繼續淡靜。 今日順利回補上周五所遺下嘅下跌裂口24099-24332；值得留意如回補上周五下跌裂口後，再度回落至裂口底部24099之下，及完全回補今日出現嘅24040-24198上升裂口，甚至回落至24000水平之下，則大市僅屬跌市中後抽，完成後抽跌勢或持續，一旦再度失守23800，則跌勢將加劇，短線支持為23400。至於反彈阻力方面，先以裂口頂部24350-24400為首個阻力，暫時回補咗上周五下跌裂口後，未能企穩裂口之上，亦剛好為6月至8月浪段黃金比0.5，亦為5日線及5周線所在。不過今日收市若然企到24200，而本周餘一時間都唔補今日個上升裂口，日線就會出現一個島形底，或有助扭轉目前弱勢，延續反彈。能企穩24400，下一阻力為24600為10日線及5周線所在；至於20日線及20周線約24750-24800，亦為浪段黃金比調0.382所在，阻力甚大。大市如能反彈至24800企檼至少三個交易日，則反彈扭轉弱勢，再挑戰24950-25000，但以目前成交如此薄弱嚟睇，要向上突破24600難度甚大。