【盤房來料】 港股短線超賣回吐需守24800(230926).docx

港股短線超賣回吐需守24800 國際油價繼續回落，美國總統特使與伊朗外長趁喺聯合國大會期間會晤，美股周二個別發展。道指高開253點後，升幅擴大至最多270點，隨後喺金融及部份科技重磅股拖累下，一度倒跌322點，最低報51726，收市跌幅收窄至185點或0.36%，報收51863；標指大致持平，報7764；納指則升122點或0.45%，報27244，連續第二日破頂及創收市新高。 睇返阿Man個短炒倉，MU之前喺992買嘅貨，話等1050-1080，但忍唔住1055飛晒出街，見開市守到5MA，又後悔落車，狗衝返1042，博股價再上埋1080，開市後一直無再穿1050，仲突破埋980至1080個移動區間頂，暫時用返個1070做防守，睇下係咪玩上一級，上到前頂1254，行1050-1250呢個range。GOOG先升後倒跌1.1%，328買嘅貨，將個防守位上移至10MA同20MA附近，335至340。DELL終於等到佢回頭，結果喺550之前落車個位買返，強勢股回吐有限，去到10日線附近都要上返車，然後用條20MA，即係516做防守，要有少少貨看下門口。INTC衝返115一注，股價企穩120，一於跟住佩洛西呢個議長股神，佩姐唔落車，阿Man坐定定。MSFT未發力，暫時喺500邊上落，目標550不變，但前題係要守到480。亞馬遜則跌1.3%，思科滑落4.5%，為跌幅最大道指成份股。META今轉因為全新AI智能體Muse爆升，但短炒完全無參與，只係長期持貨嘅免本貨仲喺手，其實相對有AI主題嘅科技股，META現價估值仍然係低，極有可能大行會重估其價值，但短線急升，要等等回吐，700-720呢支持位，睇下有冇機會上車，只要市場肯畀返多一兩倍PE嘅估值，META中線上850-880亦有可能。NBIS同MRVL都要抖抖氣，不過NBIS回得算多，守到230-233就等下先。AVAV更差，資金暫時唔多炒呢個板，加上估值唔平，158買嘅貨，有乜唔對路都要跳車。NQ再破頂，噚晚一路守住個30750分水嶺，最高上到3170，不過短線RSI 2去到98，隨時出現短線回調。今晚分水嶺喺31000，支持30900/30800/30700，阻力就唔估頂喇，總之睇返啲支持位。 美國10年期債息曾續回落3.06個基點，至4.9204厘，對息口較敏感嘅2年期債息下降3.57個基點，至4.7105厘。聖路易斯聯儲銀行總裁Alberto Musalem於路透訪問中指出，聯儲局本月加息後，貨幣政策對經濟仍具刺激性，認為當局需額外再加息，以助達到通脹目標。持續需求及供應力量繼續導致通脹保持高企，如果唔繼續收緊貨幣政策，相信未來18個月通脹將大幅超出2%目標。美滙指數曾跌0.12%，至100.307；其後轉挫0.3%至1.143美元；日圓最多漲0.34%，至156.83兌每美元。不過加息預期似乎對美股氣氛無太大影響，納指連環破頂，其實只要啲企業盈利頂得到，美股即使有調整，都係短暫而輕微，美股牛市未有耐結束。 港股昨日連續第三個交易日上升，最多升211點見25254，曾一口氣收復20日線及100日線，其後大部份升幅蒸發，20日線(25171)得而復失，但剛好守位100日線(25086)收市，報25087。成交額略為增加至2492億元，北水連續第十二個交易日錄得淨流入。至夜期時段，跟隨美股科技股做好，夜期一度再攀升至25300水平，可惜未能企穩，一度再逼近日市低位，收市重返25100水平，今早黑期於25100水平之上徘徊。本來市場憧憬習特會有內地科企隨團，或對中美貿易帶嚟一啲好消息，但今早有報道指習大大美國之行，唔會帶領中企高管代表團訪美，一下子令市場憧憬幻滅。今早恒指低開低走，開市無耐已失守25000，失守100日線及20日線，半日叫守住5日線及10日線，但呢兩條線都危危乎，暫時24800支持不容有失，否則又再試返上周低位。幸而今日跌市半日成交縮水至988.15億元，北水繼續錄得淨流入，即管睇睇喺北水獨撐下，24800呢個支持位守唔守得住。 其實連升三日後嘅港股，短線已見超買，加上成交有限，向上動力仍不足，暫時未有條見扭轉上落市格局再展升浪。港股需要更明確利好消息配合，再加埋成交拉動價量齊升，先有機會扭轉目前局面。中美矛盾亦難以靠一次習特會就能徹底解決，較大機會都係畀個面嘅小修小補，而環球通脹高企下，仍然受到加息威脅，大環境嚟講後市表現難以睇好。恒指短線阻力為25250-25350，即30日線及50日線所在，而下一阻力為25450-25500，10月線所在，上方250日線即25700阻力更大。至於短線今日首個支持25000-25050即100日線已失守，下一支持為10日線及5日線約24800-24900，亦為20周線所在，一旦再跌穿24800，則確認移動區間維持於保力加中軸下方，或再考驗本月低位。