【盤房來料】 港股短線超賣去年高位24800望能守(280526).docx

港股短線超賣去年高位24800望能守 國際油價大幅回落，美股周三反覆，道指盤中破頂，並與標指及納指齊創收市歷史新高。截至周二止，標指今年累漲近10%。繼摩根士丹利及德銀後，高盛策略員Ben Snider發表報告，稱持續盈利增長將繼續帶領美股向上，因此將標指今年底目標，由原先7600上調至8000。以全年計回報達17%。由於首季業績異常強勁，高盛把標指今年每股盈利預測上調至每股340美元，意味按年增長24%，並提到人工智能(AI)基建投資受惠企業將佔標指成份企業今年約一半每股盈利增長；明年每股盈利料升13%。美股收市，道指升182點或0.36%，報50644；標指微升1點或0.02%，報7520；納指倒升18點或0.07%，報26674。不過美股嚟到呢啲位，開始又要抖抖氣，做返個調整，喺高位整固一下嘅機會都大。 個股方面，MU噚日盤前已沽出四分一，開咗市再減以950美元減返四分一，暫時剩低嘅貨，用返個880做防守，呢個位穿調整再多少少去到830至850，唔穿就keep住先。CRWV自段永平清倉後，都開始失去動力，有少少想跟段永平落車，發掘過另外一隻KLAR為短炒目標，公司是一個由人工智慧(AI)驅動的全球支付網路和購物助理。透過多種管道為消費者和商家提供一系列解決方案，包括支付、廣告和數位零售銀行服務，業務性質同AFRM相近，如果後續其執行力證明公司可以比得上AFRM，估值將可獲重評，股價有機會上去25-30。暫時股價喺16.5至17係初步支持，呢啲位可以先買一注，不過要注意個風險係估值重評唔一定兌現。NBIS同INTC無乜特別，暫時持有。至於ONDS於等到佢開車，股價盤後上到11美元樓上，希望快放一段，推埋上去12元。噚日阿Man發緊牢騷嘅META同NFLX，前者終於開車，公司首次向消費者推出AI聊天機械人訂閱服務，股價盤中上到635，但盤後又穿返630，但呢個估值嘅META真係唔算貴，問題係暫時無乜其他利好消息，都係吽吓吽吓。NQ明顯要抖氣，盤前最高見過30379，但開市掉穿返30000，阿Man執筆時，個NQ落到29800邊，似乎NQ都係時候做下調整，今晚NQ個好淡分水嶺喺29800，支持29700/29600/29500，上方阻力29900/30000/31000。 至於港股昨日表現強差人意，早段僅微微高開9點後反覆向下，盤中一度跌341點至25258低位，幾乎完全回補4月8日所遺下之大型上升裂口25254至25633，成交額則3207億元，跌市下成交重返3000億元之上。今早港股低開低走，低開97點見25230，已經係半日高位，A股跟外圍走軟，大市低開低走，一盤跌逾500點，跌591點，低見24737點，並挨近半日低位收市。恒指收報24740點，跌587點或2.32%。半日成交1951.99億元，北水淨流入84.58億元。恒生指數已連續四個交易日收市低於250日線，不僅走勢明顯轉弱，如短期內仍未能收復有牛熊分界線之稱嘅250日線，技術上更開始步入熊市。目前恒指關鍵為24800不容有失，今早失守後，未知午後能否企穩。如進一步跌穿此支持區，下向下往3月低約24200-24500水平探底機會大增。而10日線已先後跌穿20及50日線，發出雙死亡交叉，除非恒指能盡快收復25700-25800水平，重返10日及50日線，方能擺短危機，而此水平已成交短線反彈阻力，20日線約25950-26000及100日線約26150水平阻力更大。