【盤房來料】 港股考驗250日線不容有失(040326).docx

港股考驗250日線不容有失 噚晚美股走勢相當精彩，可以話係來回地獄又折返人間，中東戰火未停，市場擔心今次中東戰爭未能短期內結束，國際油價急升或令通脹重燃，各地央行減息預期降溫，環球股市昨日全線仆直。昨晚美股道指早段急插1200點，俗稱「恐慌指數」嘅VIX波動指數一度跳升31.3%，至28.15；美元轉強觸發貴金屬拋售。道指裂口低開411點後，跌幅擴大至最多1277點，低見47626，其後有消息指伊朗或於短期內投降，尾段一度縮窄跌幅至209點，高見48695，加上紐約聯儲銀行總裁John Williams表示，伊朗戰爭開打至今影響相對溫和，目前美國長期通脹依然非常穩定，暗示目前無需緊急收緊貨幣政策，向市場派定心丸。雖然特朗普表示戰事或需延長至數周計，但佢同時表示會請美國海軍為途經霍爾木茲海峽油輪提供護航，同時指示美國國際開發金融公司(DFC)，為途經海灣海上貿易，特別係能源運輸，提供政治風險保險及財務擔保；侵侵呢番言論成功安撫市場緊張情緒。美股盤中跌幅逐步收窄，至收市，道指回吐403點或0.83%，報48501；標指跌64點或0.94%，報6816；納指跌232點或1.02%，報22516。不過反映中概股嘅金龍指數急跌逾3%，令夜盤盤中曾跌穿25000水平，但其後隨美股反彈，重返25400水平收市。 睇返啲個股，上咗車嘅Nvidia(NVDA)都算幾硬淨，暫時守住喺支持位之上，總之防守位唔下破，有貨都係持有住先。ONDS同樣唔穿防守位，都係繼續持貨先，唔穿8.5美元，都係分注入貨。雖然未知美伊之戰幾時結束，但以雙方嘅實力，估計唔會好似俄烏戰事咁拖咁耐，依家戰火連天，市況一定係動盪，不過正好畀機會阿Man撈下啲優質美股。重磅嘅吼緊TSM台積電，用返個335做防守，340-350上車；GOOGL就吼位喺280-300上車，用返個270美元做防守。至於NQ個分水嶺今晚係24500，支持24400/24300，反彈首個阻力24650-24700；24800-24850阻力會大少少，企得到可以睇埋24950-25000先再有阻力。暫時24300見到有個短期雙底，如果下破24300，就要睇到去23900-24000呢啲大支持位。 港股昨日高開低走，恒生指數高開130點，最多升159點見26218高位，可惜未能收復26300頸線位置，加上A股顯著下跌，拖累恒指午後跌幅擴大至332點，低見25727，全日跌291點或1.12%，報25768，成交額則增至3705億元。至夜期及ADR時段，市場擔心中東戰爭未能速戰速決，或會導致油價急升，如油價持續高企推高通脹，或減慢各地央行減息步伐，美股早段狠跌，道指一度跌逾千點，俗稱「恐慌指數」的VIX波動指數一度跳升31.3%，至28.15；美股急跌下，夜期一度急瀉至25000水平，盤中更略穿25000，不過夜期收市則隨美股反彈，重上25400水平收市，而ADR則亦跌至25400-25500水平，低水300點，今早黑期亦於25400-25500水平徘徊，今早大市裂口低開，恒生指數低開298點，跌幅一度擴至804點，低見24963，一下踩到落去條250日線，中午跌幅收窄至717點或2.78%，報25051，險守250日線；國企指數跌206點或2.4%，報8401；科技指數跌95點或1.95%，報4781。主板成交2076億元，仲未見明顯放量，即係市場又未到好恐慌，亦唔見有大量資金入撈貨。 之前一直強調，若恒指跌穿26300頸位置，將加大下調壓力，結果昨日大市高開無法重返26300水平即再掉頭向下，而中東戰火未停，已預期本周市況仍動盪。今日留意大市再度裂口下跌，早上無法即日回補下跌裂口，重上25600-25700水平，半日已下試250日線。留意今日如守住25000條250日線，再睇下外圍有冇反彈，反彈初步阻力喺25200-25250，下一阻力為25450-25500，要盡快回補今早嘅下跌裂口，重返25700，大市先有條件喘定同結束呢個跌浪。暫時穿頸線後第一個回調目標24950-25000已到，守唔住條250日線，跌浪持續，下方目標係24800/24600。不過外電有消息指伊朗已耗盡彈藥，有機會於短期內投降，如伊朗戰事能盡快結束，則環球股市有望扭轉目前劣勢。另一方面，內地兩會政協會議咁人大會議將於今明兩日揭幕，會期七日，留意會上有否公布更多扶持經濟發展政策，以及貨幣政策發展，或有助港股於現水平有支撐，甚至結束調整展開反彈。