【盤房來料】 港股反彈首個目標回補裂口修復250日線(240326).docx

港股反彈首個目標回補裂口修復250日線 美國總統特朗普又TACO，本來侵侵話要炸伊朗啲發電廠，噚晚突然宣布攻擊行動押後5天，戰事略為緩和，令跌到一仆一碌嘅環球股市暫鬆一口氣，美股周一報復式反彈。道指最多曾升逾千一點，國際油價一度急跌超過14%。不過，伊朗方面否認與美國展開談判，伊斯蘭革命衞隊空天部隊司令穆薩亦稱當前戰鬥將持續進行。伊朗外交部發言人亦表示喺過去24日衝突中，伊朗並未與美國進行任何談判，消息令美股升幅大為縮窄。道指大幅高開226點後，升幅曾擴大至1135點，高見46712，收市道指升631點或1.38%，報收46208；標指升74點或1.15%，報收6581；納指升299點或1.38%，報收21946。 噚日阿Man已表示，睇下投資組合嘅股份，會唔會觸及止蝕，結果全部安渡過未有到需要止蝕，不過暫時見油價仲係高企，沙地及阿聯酋接近加入伊朗戰爭，紐約期油又上返90美元樓上，都唔好掉以輕心，以為中東局勢好快明朗化，場仗好快會結束。留意個恐慌指數VIX，仍然高企喺25水平附近，個VIX唔落返18樓下，美股其實未脫險，噚晚嘅暴力反彈，暫僅視為急跌後技術反彈。噚日嘅<>畀咗一個NQ嘅要支持位大家，結果NQ就守住個23600，甚至連23700都無穿過，就借侵侵TACO消息反彈。今晚NQ個好淡分水嶺喺24200，下方支持24100/24000/23900/23800，上方阻力24300/24400/24500/24600，留意返NQ上唔返24600之上，連條10日線都過唔返，嚟緊啲平均線會逐步向下移，走勢係偏淡。 昨日港股反覆走軟，因中東戰事持續，特朗普曾於周末發最後通碟，威脅伊朗若不開放霍爾木兹海峽，將猛烈攻擊當地石油設施，消息刺激紐約期油價格重上100美元，同時亞洲區內股市急跌，港股低開低走，恒生指數一度跌逾千點，最終收市跌894點或3.54%，報收24382。不過情況於夜期時段扭轉，侵侵又指過去兩日與伊朗領導人進行建設性對話，固此推遲對伊朗嘅軍事行動，侵侵TACO刺激美股急速反彈，港股於ADR及夜期時段重返二萬五水平，今早黑期則於24900水平徘徊。不過恒指高開377點，但開市就唔少博反彈嘅穫利沽盤，升幅一度收窄至173點，見24555半日低位。其後承接A股升勢，恒指升幅再度擴大至最多455點，見24837半日高位。恒指中午收報24829，升447點或1.84%；國指升118點或1.43%，報8426；科指升67點或1.42%，報4779。大市半日成交1495.86億元，北水淨流出112.77億元。其實睇成交都見到個市反彈動力不足，以為上半場可以乘勢上去回補昨日嘅下跌裂口，上一上去挑戰250日線約25100水平，結果係25000個影都唔見。以噚日單日曾經跌逾千點嚟計，今日呢個反彈確係令人失望。 港股反彈力水麻麻，除咗係北水相當短癮之外，其實係因為油價仍然高企，雖然目前中東戰事有所緩和，但實際上戰事仍未結束，紐約期油亦處於90美元水平附近，遠較美伊戰爭開打前，紐約期油於60-65美元高出近五成。如石油供應無法回復正常水平，油價持續高企，仍會對通脹構成威脅，並拖累全球經濟表現，當然對股市會帶來壓力。預期喺美伊戰爭未正式結束，各地股市、油價及金價仍會受相關消息影響，港股仍將維持反覆表現一段時間。短線反彈料25150-25250有一定阻力，下一阻力為25450/25650，大市除非能重返26000水平之上，突破下降軌並修復所有移動平均線，方能扭轉弱勢。而短線首個支持為昨日跌裂口頂部約24750，下一支持為24550-25600上半場低位，失守將向下回試25350-25400支持，下方較大支持為24000-24200，一旦跌穿24000，跌勢將加劇，下方支持為23600。不過以月波幅計算，本月波幅已達2200點，估計本月高低位已見，短線技術超賣反彈，先睇下個下跌裂口補唔補得返，同埋25100條250日線企唔企返穩。