【盤房來料】 港股順勢挑戰250日線暫遇阻(290726).docx

港股順勢挑戰250日線暫遇阻 多家美企業績亮表現唔差，不過晶片股跌跌不休，美股周二個別發展，資金繼續流向老登股。道指高開282點後，升幅擴大至最多691點，高見52901，；標指曾跌0.41%，其後一度倒升0.52%；納指最多續挫1.41%。道指一度700點，收市略為回順，升537點或1.03%，報52747；標指升16點或0.21%，報7428；納指跌55點或0.22%，報24876。不過；納指100回吐0.98%，而費城半導體指數一度挫6.53%，收市跌4.49%，報11035。 資金流入老登股，蘋果公司股價一度升1.77%，見342.89美元紀錄新高，市值首次突破5萬億美元，並成為第二家達到該里程碑嘅企業，股價收市升幅收窄至0.9%，報340.08美元；微軟揚升1.1%，阿Man有一注388蚊嘅短炒貨，等到項頸都長，仍未等到MSFT上返400樓上，都係繼續持有先。DELL一開市就穿埋400，暫時都唔會撈底住，不過噚日落到358即反彈，可以用返呢個價做主指標先，睇係咪喺360-370水平守得穩。NVDA仍然守喺190樓上，其實呢個都係合理價，反正短炒倉都極度空虛，都係暫時持有。至於阿Man嘅愛股MU真係跌穿850後，直落到780-800，雖然噚晚反彈上返820收市，但夜盤又再插水，更穿埋780呢個支持區20周線喺745，5月線喺760，呢兩個位斷估守得到嘅，但純睇日線圖真係相當醜怪，暫時未有膽量接飛刀。下周公布上市後首份業績嘅SpaceX股價曾插5.7%，創掛牌後新低報107.01美元，收市倒升2.6%，報116.49美元，SPCX上市後唔夠一星期，當股價跌穿180時，阿Man已經提咗無得再搞，結果上市威咗幾日就跌到依家，100美元算係一個大嘅心理關口，斷估都係一個支持位嚟。唔單止MU插水，SK海力士ADR亦跌近9%；晶片股未止瀉，美光(Micron)和SK海力士ADR都跌約8.9%；SNDK更跌14.3%，資金從呢個板塊全面撤退。INTC走得快好世界，跌穿100斬立決，雖然短炒105嘅貨輸住7元止蝕98，回頭一望夜期現價82，絕對係要嚴守止蝕。NQ跌穿28000，上唔返28200就級級落，目前喺27800條100日線附近徘徊。今晚NQ個分水嶺係27800，支持27700/27600/27500/27400，上方阻力27900/28000/28100/28200。 聯儲局開始一連兩日議息會議，美國10年期債息一度回落5.9個基點，報4.582厘，對息口較敏感嘅2年期債息降6.7個基點，至4.256厘。暫時市場都係預咗今次息率唔會有變動，雖然油價仍未顯著回落，但通脹威脅唔算強，理應未有加息嘅需要，至於減息似乎未有條件做到，維持息率不變應該係聯儲局選項。重點係汱爺會後聲明放鴿定放鷹，將會對今晚美股帶嚟一波震盪。美滙指數最多倒跌0.28%至101.26，日圓跌0.12%至163.95兌每美元。 港股昨日反覆回升，恒指高開後，一度升233點見25440高位後回軟，曾倒跌137點見25069低位，至收市前市況回穩，恒指最終升103點或0.41%，報25310，成交額2506億元，同時北水再次錄得淨流出24.95億元，已連續第四日錄得淨流出，合共四個交易日，北水累計已錄得淨流出資金近百億元。不過最接近恒指現價1000點上下區間嘅牛熊證街貨量，再度出現嚴重失衡情況，熊證重貨佔比超過七成，僅僅25400至25800熊證街貨量，已等同超過2800張期指，唔排除期指大戶借勢挾高恒指，於明日結算前借勢平倉及高位轉倉。目前恒指250日線處於25718，料為今日首個阻力，至於25800接近日線保力加頂部25867，料為下一阻力，值得留意日線保力加通道再次往上打開，而20日線現處於24374持續往上移，繼續以此方向發展，20日線今日料進一步上移至24400水平，有望升穿正往下移之50日線現處於24588，繼10日線升穿50日線後，出現第二個發金交叉。不過自恒指升抵25000水平後，成交額一直未能配合價量齊升，一旦調整多日嘅AI股止跌回升，再重新吸引資金趁低吸納，不排除資金再度轉向。留意恒指如成功挑戰250日線後能否企穩，如250日線未能企穩，以及由6月低位延伸至今嘅上升通道底部再次跌穿，底部現處於25300水平左右，則升勢或未能延續。至於下方首個支持為5日線，料今日將上移至25200水平，10日線則上移至25090水平，接近處於25124水平嘅100日線，20周線約25000水平為重要支持。如失此幾條平均線，短線港股或先作調整，下方支持為20日線及50日線，支持區為24400-24600水平。